މުޅި
އުމުރަށްވެސް ލޯބި ވާނަމެވެ.... (ތިންވަނަ ބައި)
(ދެވަނަ
ބަޔާއިގުޅޭ)..............
ބައްދަލުވުން ކުރިޔަށް ދިޔައިރުވެސް އަހަންނަށް
ހޯދުނީ އެކުއްޖަކު ފެނޭތޯއެވެ. ނަމަވެސް ފުދޭވަރަކަށް ކުދިންގިނަވެފައި
އަންހެންކުދިންތިބީ ފިރިހެންކުދިންގެ ކުރީގައި ކަމުން ފަހަތުން އެކުއްޖަކު
ސިފަކުރާކަށް ނޭނގުނެވެ. މިކަމާއި އުޅެގެން އަހަންނަށް ބައްދަލުވުމުގައި ދެއްކި
އެއްވެސް ވާހަކަޔަކަށް ސަމާލުކަމެއް ނުދެވުނެވެ. ބައްދަލުވުންވެސް ނިމިއްޖެއެވެ.
ހުރިހާ ކުދިންނާއި ބެލެނިވެރިން ހޯލުންވެސް ނުކުންނަންފެށިއެވެ. އަހަރެން އަވަސް
އަވަހަށް ރައްޓެހިންނާއި ދުރަށް ހޯލުގެ އެއްކައިރިޔަށް ޖެހިލާފައި އެކުއްޖާ ފެނޭތޯ
ހޯދީމެވެ. ނުފެނުނެވެ. ހޯލުން ނުކުމެގެންވެސް އެހާވަރަށް ހޯދީމެވެ. ނަމަވެސް
ނުފެނުނެވެ. މީހުން ގިނަވުމުން ކަންނޭގެއެވެ. އަހަރެން ވަރަށް ވަރަށް
މާޔޫސްވިއެވެ. ތުއްތަޔާއި ރައްޓެހިންވެސް އަހަރެން ހޯދަމުން ބޭރަށް ނުކުތެވެ.
ހިތްދަތިވެފައިވާ ހާލު އަހަރުމެން ގެޔަށް ދިޔުމަށްޓަކާ ހިނގައިގަތީމެވެ. އޭރުވެސް
އަހަރެން ތަންތަން ހޯދީމެވެ. އަހަރެން އުޅޭގޮތުން ތުއްތަ ކިހިނެއްވީހޭ އަހާލިއެވެ.
އަހަންނަށް ބަލާލެވުނީ އަހަރެންގެ ރައްޓެހިންގެ މޫނަށެވެ. އެމީހުން ދިމާކުރާ ފާޑަކަށް
ހީލަހީލާ ތިއްބެވެ. ތުއްތަ އަނެއްކާވެސް ހަމައެސުވާލު ކުރިއެވެ. މިފަހަރު އަހަރެން
ކަމެއް ނުވެޔޭބުނެ ހިނިތުންވެލީމެވެ. ގެއަށްދިޔަ މަގުމަތީގައި އަހަރެންގެ ހިތް
އަހަރެން ހަމަޖައްސައިދިނީ އެކުއްޖާއާއި އަދި ބައްދަލުވާނެކަމަށް ބުނަމުންނެވެ.
އެއީ އެއް ސުކޫލެއްގައި ކިޔަވަންޏާ ކޮންމެވެސް ދުވަހަކުން ފެންނާނެކަން
އެނގޭތީއެވެ.
އަހަރެންގެ ނަސީބު ތަންދިމާކުރީ އަހަރެން ހީކުރި
ވަރަށްވުރެވެސް ރަނގަޅަށެވެ. އެއީ ކިޔެވުން ފެށުނު ފުރަތަމަ ދުވަހެވެ. އަހަންނާއި
ނިހާލް ފިޒިކްސް ކްލާސް ނިންމާލާފައި ދިޔައީ ބަޔޮލޮޖީ ކުލާހަށެވެ. ކުލާހުގެ
އެތެރެއަށްއެޅި ފުރަތަމަ ފިޔަވަޅާއިއެކު އަހަންނަށް އެހެންކަހަލަ އިހުސާސެއް
ކުރެވުނެވެ. އެއްކަލަ ސެންޓުގެ ވަސް އަހަރެންގެ ނޭފަތުގައި ޖެހުނުހެން
ހީވެގެންނެވެ. އަހަރެން އެއްމިޔަކަނުން ހީނލުމަށްފަހު ހިތަށް ވިސްނުވައިދިނީ އެއީ
އާކަމެއް ނޫންކަމެވެ. އެވަހާއިއެކު އަހަރެން ރޭދުވާ ހޭދަކުރާތީވެ އެވަސް ވަނީ
އަހަރެންގެ ނޭފަތުގައި ހަރުލާފައި ކަމެވެ.
އަހަރެން ހިނގައިގަތްތަނުން
ގަލަމެއް ވެއްޓިގެންއައިސް އަހަރެންގެ ކުރިމަށްޗަށް ޖެހުނެވެ. އެވަގުތުއަހަރެން
ގަލަން ނަގާ އޭގެ ވެރިފަރާތަށް ރައްދުކުރުމަށް އެދިމާލަށް ބަލައިލީމެވެ.
އެކުއްޖާވެސް ޑެސްކު ކައިރީގައި ވެއްޓިފައިހުރި އެހެނިހެން ސާމާނުތައް
ނެގުމަށްފަހު އަހަންނާއި ދިމާލަށް ބަލައިލިއެވެ. އަހަންނަށް ފެންނަމުން
ދިޔަމަންޒަރު ގަބޫލުކުރަން ދަތިވިއެވެ. އަހަރެންގެ ހުވަފެންތަކުގެ ރާނީ ހުރީ
އަހަރެންގެ ކުރިމަތީގައެވެ. އޭނާގެ ގަލަން އޮތީ އަހަރެންގެ އަތުގައެވެ. އޭނަ
ފެންނަ ކޮންމެފަހަރަކު އަހަންނަށް ވާގޮތްތައް މިފަހަރުވެސްވިއެވެ. ގަލަން
ހިފަހައްޓައިގެން އަހަރެން ބަލަން ހުރުމުން އެކުއްޖާ ގަލަން ހޯދުމަށް
އަތްދިއްކޮށްލިއެވެ. ހިނިތުންވެލައިގެން ހުރެއެވެ. ނިހާލަށް އެއީ އެއަންހެންކުއްޖާކަން
ޝައްކުވިއެވެ. ނިހާލު ކޮޑުން އަހަރެންގައިގައި ޖަހާލުމުން ސިހިފައި އަހަންނަށް
ނިހާލުއަށް ބަލާލެވުނެވެ. ''އެއްކަލަ ކުއްޖާދޯ؟........ ހާދަ ވަރުގަދަ
އިއްތިފާގެއް؟'' ނިހާލު ސިއްރުން އަހަރެން ކަންފަތް ކައިރީ ބުނެލިއެވެ. އަހަރެން
ހީނލަމުން ގަލަން ދިއްކޮށްލީމެވެ. މިފަހަރުވެސް ވާހަކަދައްކާނެހާ ހިތްވަރެއް
އަހަންނަށް ނުލިބުނެވެ. އަހަރެން އަވަސްއަވަހަށް ހިނގާފައިގޮސް ފަހަތުގައި ހުރި
ގޮޑިއެއްގައި ޖައްސާލީމެވެ. ''ކީއްވެ އެއްޗެކޭ ނުބުނީ؟.... ކުޑަމިނުން ނަންވެސް
އަހާލިނަމަ...'' ނިހާލު އައިސް ކައިރީގައި ހުރި ގޮޑީގައި ޖައްސާލަމުން
އެހެންމީހަކަށް އަޑުނީވޭވަރަށް ބުނެލިއެވެ. އަހަންނަށް ނިހާލުގެ ސުވާލަކަށް
ސަމާލުކަމެއް ނުދެވުނެވެ. އަވަސް ނޭވާލަމުން އަހަރެން މަސައްކަތް ކުރަމުންދިޔައީ
އަހަރެންގެ ބާރުބާރަށް ތެޅެމުންދިޔަ ހިތް މައިތިރި ކުރެވޭތޯއެވެ. ދޭތެރެއަކުން
އަހަރެން އެއްކަލަ ކުއްޖާއަށް ކަޅިއެއްލާލަމެވެ. ފަހަތުން ފެނުނަސް އެއީ އޭނަކަން
އެނގުމުން ހިތަށް ވަރަށް ހިންހަމަޖެހުން ލިބުނެވެ. އެއްވެސް ކަމެއްނެތި އަހަންނަށް
ހިނިތުންވެލެވެއެވެ. ކުލާސް ނިމުނުއިރުވެސް އަހަރެންގެ ހާލަކީ މިއީއެވެ. އެދުވަހު
އަހަރެން ބާކީދިޔަ ހުރިހާ ކުލާހަކަށް އެކުއްޖާވެސް ދިޔައެވެ. އެކަކުއަނެކަކަށް
އަހަރުމެން ދެމީހުންނަކީ ދެ ބީރައްޓެހިންކަމުގައި ވިޔަސް ލޯބައްދަލުވާ ކޮންމެ
ފެނިލުމަކުންވެސް އަހަރުމެން އެކަކު އަނެކަކަށް ހިނިތުންވުމެއް ރައްދުކުރަމެވެ.
އޭނާގެ ހިނިތުންވުމުގައި ޖާދުވީ ބާރެއްވާ ކަހަލައެވެ. އެހިނިތުންވުން އަހަރެން
އެހެން ހުރިހާކަމަކުން ހަނދާންނެތިކޮށްލުވައެވެ. ފުރަތަމަދުވަސް ދިޔައީ އެކަހަލަ
ގޮތަކަށެވެ.
އަހަރެން ގެއަށް އައީވެސް އެކުއްޖާ ގެއަށް
ދިޔުމުންނެވެ. ދުރުން އަހަންނާއި އަހަރެންގެ ރައްޓެހިންތިބީ އެމަންޒަރު ސިއްރުން
ބަލާށެވެ. އެކުއްޖާ ރައްޓެއްސަކާއިއެކު ދާންވެގެން ދެވުނީ ފުދޭވަރަކަށް
ލަހުންކަމަށް ވުމާއިއެކު އަހަންނަށް ޖެހުނީ ނިހާލުމެންވެސް ހިފަހައްޓައިގެން
މަޑުކޮށްލާށެވެ. އާދައިގެ މަތިން މިކަންވެސް ވީ އެމީހުންނަށް މަޖާކަމަކަށެވެ.
ނުވާންވީ ކީއްވެހެއްޔެވެ! އެއީ ދުވަހަކު އަހަރެން ކުރިކަމެއް ނޫނެވެ. އެދުވަހު
ގެއަށްގޮސް އަހަރެން އުޅުނުގޮތް އެހެން ހުރިހާ ދުވަހަކާއި މުޅިންތަފާތުވިއެވެ.
މޫނުމަތިން ހިނިތުންވުން އެއްފަހަރު ކެނޑިނުދެއެވެ. ތަސްވީރެއް ފަދައިން
އެއަންހެންކުއްޖާގެ އެކި މަންޒަރުތައް އަހަރެންގެ ސިކުޑީގައި ދާއިމަށް
އެނބުރެމުންދިޔައެވެ. ފާޚަނަޔަށް ވަދެ ފެންވަރައިލައިގެން ހުސްގަޔާ ލޯގަނޑުން
ބަލާލިއިރު އެލޯގަނޑުންވެސް ފާޅުވީ އެއަންހެން ކުއްޖާއެވެ. އަހަންނަށް ލަދުން
ވަގުތުން ތުވާލިން ހަށިގަނޑު ފޮރުވާލެވުނެވެ. އަދި އަމިއްލަ މޮޔަކަމާއިމެދު
ހިނިއާދެވުނެވެ.
އެރޭގެ ދިގުކަމާއިމެދު އަހަރެން ހަމަ
ހައިރާންވިއެވެ. ހެނދުނުވާލެއް އަހަރެން ހުރީ ލަސްވެފައެވެ. ކުރާނެ މާބޮޑުކަމެއް
ނެތުމާއިއެކު އަހަރެން ފަނަރަވަރަކަށް މިނިޓް ވަންދެން ގޭމް ކުޅުނީމެވެ. ނަމަވެސް
އެއަކަށް މާބޮޑު ފަރުވާތެރިކަމެއް ނުދެވުނެވެ. ބޭނުންވީ ވީހާވެސް އަވަހަކަށް
ނިދާލާށެވެ. އަވަހަށް އަނެއްދުވަހަށް ލޯހުޅުވުމަށްޓަކައެވެ. އެހެންކަމުން ކިޔަންފަށާފައިވާ
ވާހަކައެއް ނަގައިގެން ކިޔަންފެށީމެވެ. އެއީ އަހަންނަށް އެންމެފަސޭހައިން ނިދޭ
ގޮތްކަމަށް ވާތީއެވެ. ނަމަވެސް ނިދުނީވެސް އެހާ ގިނައިރުވީ ފަހުންނެވެ. އަދި ހަމަ
ލޯޖެހުމާއިއެކު ހޭލެވެއެވެ. އިރުއަރަންދެން އަހަރެން އުޅުނީ މިސަކަރާތެއްގައެވެ.
ދެހަފްތާވަރު ފާއިތު ވަންދެން އަހަރެން
އުޅެންޖެހުނީ މިހާލެއްގައެވެ. މި ދެހަފްތާ ތެރޭގައި އަހަންނަށް ހަމައެކަނި އެނގުނީ
އެކުއްޖާގެ ނަން އެކަންޏެވެ. އެވެސް އެހެންމީހެއްގެ ދުލުން ކީއަޑު އިވިގެންނެވެ.
ތޫބާއެވެ. އޭނާގެ ރައްޓެހިން އޭނަޔާދިމާލަށް ލޯބިން ގޮވަނީ ހަމައެކަނި ތޫއޭ
ކިޔާފައެވެ. އެއްކުލާހެއްގައި ކިތަންމެ ވަގުތެއް ހޭދަކުރިކަމުގައިވިޔަސް އިސްވެ
އަހަންނަށް ތޫއާއި ވާހަކަދައްކާކަށް ނުކެރެއެވެ. އަހަންނަށްވުރެ ނިހާލުވެސް
މާކެރެއެވެ. އޭނަ މަދުމަދުން ތޫއާއި ވާހަކަދައްކައެވެ. ތޫ ފެންނަ ހިސާބުގައި
އަހަރެން އަބަދުވެސް މަސައްކަތްކުރަނީ އަހަރެންގެ އިހުސާސްތައް އޭނާއަށް
ފޮރުވޭތޯއެވެ.
ދުވަސްތައް ފާއިތުވަމުން ދިޔަހެން ދެމީހުންގެ
ދޭތެރޭގައިވާ ބީރައްޓެހިކަން ދުވަހެއް ދުވަހަކަށް ކެނޑެމުންދިޔައެވެ. ތޫފެނުމުން
އަހަންނަށް ކުރާ އިހުސާސްތަކަށް ބަދަލެއް ނަޔަސް އެއިހުސާސްތައް ކޮންޓްރޯލް ކުރަން
އަހަންނަށް ދަސްވިއެވެ. ހިތުތެރޭގައި އަބަދުވެސް އުންމީދުގެ ހުޅުކޮޅެއް ދިއްލިފައި
އިނދެއެވެ. ތޫ އަހަރެންގެ މީހަކަށް ކޮންމެވެސް ދުވަހަކުން ވާނެކަމެވެ. ތޫއާއި
އެންމެފުރަތަމަ އަހަރެން ވާހަކަދެއްކީ ކުލާސްތެރެއިންނެވެ. ބަޔޮލޮޖީއިން
ހަވާލުކުރި ޕެޔަރ ޕްރޮޖެކްޓެއްގައި ދެމީހުން މަސައްކަތް ކުރަންޖެހުމުންނެވެ. އަހަންނަށް
އެންމެފުރަތަމަ ތޫއާއި ވާހަކަދެއްކުނީ އަޅައަޅައި ގަންނަމުންނެވެ.
ފިރިހެނަކަށްވެހުރެ އަހަރެންގެ ފިނޑިކަމާއިމެދު ހައިރާންވިއެވެ. ނަމަވެސް އެއީ
އަހަރެން ތޫދެކެވާ ލޯތްބެވެ. މިހިތުން އޭނަޔަށް ދެވިފައިވާ ގަދަރާއި މަތިވެރި
މަގާމެވެ. އެއީ އަހަންނާއި ތޫގެ ގުޅުމުގެ ފެށުމެވެ. އަދި ތޫ ހޯދުމަށް އަހަރެން
އެޅި ލޯބީގެ ފުރަތަމަ ފިޔަވަޅުވެސްމެއެވެ.
އެއްމަސްދުވަހަށް މަސައްކަތް ކުރަންޖެހުނު މިބުނި
ޕްރޮޖެކްޓް ނިމުނުއިރު އަހަރުމެން ދެމީހުންގެ ގުޅުން ހީކުރިވަރަށްވުރެ
ބަދަހިވިއެވެ. ތޫއަކީ ވަރަށް އެކުވެރި މަޖާ މިޒާޖެއްގެ ކުއްޖެކެވެ. އެއީ ވަރަށް
މަޑުމައިތިރި، ހިތްތިރި، ކެތްތެރި އަދި އެހާމެ ހިތްވަރުގަދަ ކުއްޖެއްވެސްމެއެވެ. ތޫއާއި
ބެހޭގޮތުން އަހަންނަށް ވަރަށް ގިނައެއްޗެހި އެނގުނެވެ. ދޭތެރެއަކުން އޭނަ ދިރިއުޅުމުގެ
ވާހަކަތައް ހިއްސާ ކުރާތީއެވެ. ތޫގެ އުފަންރަށަކީ ދ. ކުޑަހުވަދޫއެވެ. ތޫގެ
މަންމަޔާއި ބައްޕަގެ ހަތްކުދިން ތިބެއެވެ. އޭގެތެރެއިން ތޫއަކީ އެންމެ ދޮށީ
ކުއްޖާއެވެ. ތޫގެ އާޢިލާއަކީ ރަށުގެ ފަގީރު އާއިލާއެކެވެ. މާލޭގައި ތޫ ދިރިއުޅެނީ
އޭނާގެ ބައްޕަގެ ރައްޓެއްސެއް ކައިރީގައެވެ. އެންމެ ކުޑައިރުއްސުރެ ތޫގެ
އުންމީދަކީ ކިޔަވައިގެން ހަރުދަނާ މީހަކަށް ވެގެން އާޢިލާގެ ޒިންމާނެގުމެވެ.
އޭނާއަށްވުރެ ހަގަށްތިބި ކުދިންނަށް ރަނގަޅު މުސްތަގުބަލެއް ހޯދަދިނުމެވެ.
ކިޔަވައިނިމިގެން ތޫ ބޭނުންވަނީ ޑޮކްޓަރަކަށް ވުމެވެ. ނަމަވެސް އެހުވަފެން
ހަގީގަތަކަށް ނުވާނެކަމަށް ތޫބުނެއެވެ. އެއީ އެކަމަށް ހޭދަވާނޭ ދުވަސްތައް ގިނަވުމުންނެވެ.
އެހުވަފެން އަވަހަކަށް ކާމިޔާބު ނުވިނަމަވެސް ކޮންމެވެސް ދުވަހަކުން އޭނާ
ޑޮކްޓަރަކަށް ވުމަކީ އޭނާގެ އަބަދުގެވެސް އުންމީދެވެ. ތޫގެ މިޒާޖާއި އަދި އޭނަޔާއި
ބެހޭގޮތުން އަހަންނަށް އެނގެމުން ދިޔަވަރަކަށް އަހަރެންގެ ހިތުން ތޫއަށް
ދެވިފައިވާ މަޤާމް ދިޔައީ ދުވަހެއް ދުވަހަކަށް ވަރުގަދަވަމުންނެވެ. ތޫދެކެ
އަހަރެންވާ ތެދުވެރި ލޯބި ދިޔައީ ދުވަހެއް ދުވަހަކަށް ފުންވަމުންނެވެ.
މާޒީގެ
އުފާވެރި ސޮފްޙާތަކުން އަހަންނަށް ބޭރަށް އާދެވުނީ ..........................
(ނުނިމޭ)