Mulhi Umurahves Loabi Vaanameve...... (11)

މުޅި އުމުރަށްވެސް ލޯބި ވާނަމެވެ.... (އެގާރަވަނަ ބައި)

(ދިހަވަނަ ބަޔާއިގުޅޭ)..............

އަހަރެން ބޭނުންވަނީ އަހަރެންގެ އުފަލަށްވުރެ ތޫގެ ހިންހަމަޖެހުމެވެ. އެދެމީހުން ހީނހީނފައި ވާހަކަދައްކަމުން ދިޔައެވެ. އަހަރެން ފެންކަޅިވެފައި ބަލަން ހުރީމެވެ. އެމީހުން އަހަންނަށް ބަލާލުމާއިއެކު ގަދަކަމުން ހީލަމުންނެވެ. އެމީހުންގެ ވާހަކައިގައި ބައިވެރިވަމުން ހަލުވިކޮށް އެސްފިޔަޖަހާލަމުން އަހަރެންގެ ލޮލަށް ޖަމާވަމުންދިޔަ ކަރުނަތައް ހިފަހައްޓަމުން ދިޔައީމެވެ. ނިހާލުމެން ގެއަށްއައީ އަހަރުމެން އެތާ ތިއްބައެވެ. އެމީހުންފެނުމާއިއެކު އަހަންނަށް ކުޑަ ހިންހަމަޖެހުމެއް ލިބުނެވެ. އެމީހުން އެވަގުތު އެތަނަށް އައުން އެއީ ނަސީބޭ ހިތަށްއެރިއެވެ.

ނިހާލުމެން ފެނުމާއިއެކު އަހަރެން ވަގުތުން އެމީހުންނަށް ގޮވީމެވެ. އެމީހުން އަހަރުމެން ކައިރިޔަށް އައެވެ. ނިހާލުއާއި ފާރިޝް އަހަންނާއި ދިމާލަށް ބަލާލަމުން ލޮލުގެ އިޝާރާތުން އެޑަމްއަކީ ކާކުތޯ އަހާލިއެވެ. އަހަރެން އެމީހުންނަށް އެޑަމް ތަޢާރަފްކޮށްދިނީމެވެ. އެވަގުތު އެމީހުން އަހަންނާއި ދިމާލަށް ބަލާލީ ހައިރާންކަމުގެ ނަޒަރަކުންނެވެ. އެމީހުންގެ މޫނުމަތިން އަހަންނަށްޓަކައި ހިތާމަވެރިކަން ފެންނަން ހުއްޓެވެ. ފާރިޝް އެއްޗެއް ބުނަންވެގެން އުޅުނުތަނުން އަހަރެން އާނާގެ އަތުގައި ހިފަހައްޓާ ބާރުކުރަމުން އެއްވެސް އެއްޗެއް ނުބުނުމަށް އިޝާރާތްކުރީމެވެ. އެޑަމް އަހަންނާއި ދިމާލަށް ބަލަންހުރީ ނޭނގޭ އެއްޗެއް އެނގޭ ފަދައިންނެވެ. އަހަރެންގެ ހަރަކާތާއި، ޢަމަލުންނާއި، ވާހަކަތަކުން އެޑަމްއަށް ފަހަރެއްގައި އެއްޗެއް ހީވީ ކަންނޭގެއެވެ. ފަނަރަވަރަކަށް މިނިޓްވަންދެން އަހަރުމެން ވާހަކަދައްކަން ތިބީމެވެ. އެޑަމް އޭގެ ހަފްތާއެއްފަހުން އޮތް އޭނާގެ ކޮއްކޮގެ ކައިވެނީގެ ހަފްލާއަށް އަހަރުމެންނަށް ދަޢުވަތުދިނެވެ. އެވަގުތު ފާރިޝްއާއި ނިހާލު ބަލާލީ އަހަރެންގެ މޫނަށެވެ. އަހަރެން ހީލަމުން މަޖާވެލާފައި އަންނާނެކަމަށް ބުނީމެވެ. ނިހާލުމެން އަހަރެންގެ ހަރަކާތްތަކަށް ބަލަމުންދިޔައީ ހައިރާންވެފައި ތިބެއެވެ. ފަހަރުގައިވެސް އަހަރެންގެ ހިތުތެރޭގައި އަނދަމުންދިޔަ އަލިފާން އެހެންމީހަކަށް ނޭނގެއެވެ.

ތޫ އެޑަމްގެ ސައިކަލުފަހަތަށް އަރައިގެން ދިޔަ މަންޒަރު ބަލަން އަހަރެންހުރީ ފެންކަޅިވެފައެވެ. ހިތަށް ވަރަށް ތަދުވިއެވެ. އެއަސަރު ލޮލުންވެސް ފެންނަން ހުއްޓެވެ. އިތުރަށް އަހަންނަށް ކެތްނުކުރެވުނެވެ. އަހަރެން މިސްރާބުޖެހީ ކޮޓަރިޔަށް ދިޔުމަށްޓަކައެވެ. ގޭތެރެއިން މީހަކާއި ދިމާނުވެ، އަވަސްފިޔަވަޅުތަކެއްގައި އަހަންނަށް ކޮޓަރިޔާއި ހަމަޔަށް ނުދެވެނީސް ނުހާ ކޮޓަރިން ވަރަށް ބާރަށް ނުކުތެވެ. އަހަރެންގޮސް ޖެހުނީ އޭނާ ކުރިމައްޗަށެވެ. އެވަގުތު އަހަރުމެންގެ ހަތަރުކަޅި ހަމަވިއެވެ. އިޚްތިޔާރަކާއިނުލައި އަހަރެންގެ ލޮލުން ކަރުނަ ފައިބައިގަތެވެ. އެމަންޒަރު ނުހާއަށް ނުދެއްކުމަށް އަހަރެން ވަގުތުން ނުހާ ފަސްދީގޮސް ކޮޓަރިޔަށް ވަނީމެވެ. ނަމަވެސް އަހަރެންގެ ވޭނީ ލޯ ނުހާއަށް ރަނގަޅަށް ފެންނާނެވެ. އަހަރެން ފަސްއެނބުރުމެއްނެތި ކޮޓަރީގެ ދޮރުލައްޕާލުމަށްފަހު ގޮސް ސޯފާއަށް ވެއްޓިގަތީމެވެ. އަހަރެންގެ ލޯމަތިން ސިފަވަމުންދިޔައީ ތޫއާއި އެޑަމްއެވެ. ކަންފަތުގައި ގުގުމަމުންދިޔައީ ތޫބުނި ޖުމްލައެވެ. ''މިއީ އަހަރެންގެ ބޯއިފްރެންޑް......'' ލޯމަރާލަމުން އަހަރެން ދެކަންފަތުގައި އަތްއެޅީމެވެ އިތުރަށް ކެތްނުވުމުންނެވެ. އެވަގުތު ނިހާލު އައިސް ކޮޓަރިޔަށްވަނެވެ. ފަހަތުން ފާރިޝްވެސް ވަނެވެ. އެމީހުން އައުމާއިއެކު އަހަރެން ހަމަޖެހިލީމެވެ. ނިހާލުމެން އަހަރެން ކައިރީ ސޯފާގައި އިށީނެވެ. އެމީހުން އަހަރެން ހިންހަމަޖައްސަން އެކިއެކި ވާހަކަދެއްކިއެވެ. އަހަރެން ހިންހަމަ ޖެހޭނެ ހެއްޔެވެ؟ އެހާވަރަށް އަހަރެން ލޯބިވާ، މުޅިމިދުނިޔެއިންވެސް އަހަރެން ހަމައެކަނި ބޭނުންވާ އަހަރެންގެ ތޫއަކީ އެހެންމީހެއްގެ މީހެކެވެ. ނިހާލުމެންކައިރީގައި އަހަރެން ބޭނުންވާނީ އެކަނިވާންކަމުގައި ބުނީމެވެ. އެމީހުންވެސް އިތުރުއެއްޗެކޭ ނުބުނެ އެތަނުންދިޔައީއެވެ.

އަހަރެން ވަރަށްގިނައިރުވަންދެން އެހެންއިނީމެވެ. ސިކުޑީގައި އެތަކެއް ޚިޔާލުތަކެއް އެނބުރެމުންދިޔައެވެ. އަހަރެންގެ ހިތްވަނީ މުޅިން ކުދިކުދިވެފައެވެ. އެހިތަށް އަލުން ދެން ދިރުމެއްނުލިބޭނޭފަދައެވެ. އަހަރެންގެ ނަސީބަކީ އެއީކަމަށްހީކޮށް އަހަރެން ހިތަށް ވިސްނުވައިދިނުމަށް މަސައްކަތްކުރީމެވެ. އަހަރެންގެ ނަސީބުގައި ތޫގެ ލޯބި ލިޔެވިފައިވާނަމަ އެލޯބި އަދި އަހަންނަށް ލިބޭނެކަމުގައި ހީކުރީމެވެ. ވަރުގަދަ ލޯތްބަކީ އުނދަގުލުން ހާސިލްވާނެ އެއްޗެކެވެ. ނަމަވެސް ތޫގެ ހިތުން އަހަންނަށް ހަމައެކަނި ދެވިފައިވަނީ ރަޚްމަތްތެރިކަމެވެ. ވީއިރުން އެލޯބި ހާސިލްވާނީ ކިހިނެއްހެއްޔެވެ؟ އަހަރެން ދެން ތޫއާއި ކުރިމަތިލާނީ ކިހިނެއް ހެއްޔެވެ؟ އޭނަޔާއި ހެވިފައި ވާހަކަދައްކާނީ ކިހިނެއްހެއްޔެވެ؟ އެހިތްވަރު އަހަރެންގެ ކިބައިގައި ހުންނާނެ ހެއްޔެވެ؟ ސިކުޑީގައި އެތައްކަހަލަ ސުވާލުތަކެއް ފުނިޖެހެމުންދިޔައެވެ. އަހަންނަށް އުނދަގޫވަމުންދިޔައެވެ. ތެދުވެގެންގޮސް އަހަރެން އެނދުގައި އޮށޯތީމެވެ. ބަނޑުންއޮވެ އަހަރެން ހިތްފުރެންދެން ރޯލީމެވެ. ފިރިހެނަކަށްވިޔަސް ކަރުނައަކީ ހިފެހެއްޓޭނެ އެއްޗެއްނޫނެވެ. ހިތުގައި އަޅަމުންދާ ވޭންތައް އެކަރުނުން ބޭރުކޮށްލެވުމުން ހިތަށް އަރާމުލިބެޔޭ ބައެއްމީހުންބުނެއެވެ. އަހަންނަށްވެސް ހިތްފުރެންދެން ރޯލެވުމުން ހިތަށް ކުޑަލުޔެއް ލިބުނެވެ.

އެނދުގައި އެހެންއޮވެ އަހަރެން ވަރަށްވިސްނީމެވެ. ދެންހަދާނެ ގޮތަކާއިދޭތެރޭގައެވެ. އަހަރެންގެ ދިރިއުޅުން ދެން ކުރިޔަށްގެންދާނެ ގޮތަކާއި ދޭތެރޭގައެވެ. އަހަންނަށް ވިސްނުނު އެންމެ ރަނގަޅުގޮތަކީ ތޫގެ ދިރިއުޅުމުން ދުރަށްދިޔުމެވެ. އޭނަޔާއި އޮތް ހަމައެކަނި ގުޅުންކަމަށްވާ ރަޚްމަތްތެރިކަންވެސް ކަނޑާލުމެވެ. އަހަރެންގެ ސަބަބުން އޭނަގެ އުފާވެރި ދިރިއުޅުމަށް އަނދިރި ހިޔަންޏެއް އެޅިދާނެތީއެވެ. އަހަރެންގެ ލޯބިން އޭނާޔަށް ހިތްދަތިކަމެއް ލިބިދާނެތީއެވެ. އަހަރެންގެ ޢަމަލުން އެޙަޔާތުގައި ކޫރުމެއް އެޅިދާނެތީއެވެ. އަހަރެން ބޭނުންވަނީ ތޫ އަބަދުވެސް އުފަލުގައި ވުމަށެވެ. އޭނާގެ ހިންހަމަޖެހުމަކީ އެޑަމް ކަމުގައިވާނަމަ އެގޮތްވެސް އަހަންނަށް ރަނގަޅެވެ. އޭނަޔާއިއެކު އަހަރެން އުޅުނު ކުޑަދުވަސްކޮޅުގެ އުފާވެރިކަމުގައިވެސް އަހަރެން މުޅި އުމުރު އެކަނި ހޭދަކޮށްލަފާނަމެވެ. އެއްވެސް ޝަކުވާއެއްނެތިއެވެ. ވަރަށް ގިނައިރު އެހެން ވިސްނަންއޮވެފައި އަހަރެންގެ ހިތް ކުޑަކޮށް ހަމަޔަކަށް އެޅުނެވެ.

ތެދުވެގެން ފާޚަނަޔަށްވަދެފައި އަހަރެން ބޭރަށްނުކުތީ އެއްވެސް މީހެއްގެ ޚަބަރެއްނުވާތީއެވެ. އަހަރެން ނުކުތްއިރު އެންމެން ސިޓިންރޫމުގައި ތިއްބެވެ. އެންމެންގެ މޫނުމަތީގައިވި ހިނިތުންވުމުން އެމީހުންގެ ތެރޭގައި ކޮންމެވެސް މަޖާވާހަކައެއް ދެއްކުނީކަން އެނގެއެވެ. އެމީހުން އަހަރެން ފެނުމާއިއެކު އަހަރެން ކައިރީގައި އިށީނުމަށް ބުންޏެވެ. އަހަންނަށް ބަލާލެވުނީ ކުރިމަތީގައި އިން ނުހާއަށެވެ. އޭނާވެސް އިނީ އަހަންނަށް ބަލާށެވެ. ކުޑަކޮށް ވިސްނާލާފައި އަހަރެންގެ ބޭނުން އެންމެން ތިއްބާ ބުނީމެވެ. އަހަރެން އެނބުރި ރަށަށްދާން ބޭނުންވާވާހަކައެވެ. އެންމެންގެ މޫނުމަތިންވެސް އުފާވެރިކަން ގެއްލިދިޔައެވެ. ''ކީއްވެ މާއަވަހަށް ދާން ތިނިންމީ؟ އަޔާންއަށް މިގެ ކަމުނުދަނީތަ؟ މީހަކު އެއްޗެކޭ ބުނީތަ؟'' އުބޭދުބެ ވަރަށް ސީރިޔަސްވެލާފައި ބުންޏެވެ. އެންމެންތިބީ އަހަންނަށް ބަލާށެވެ. އަހަންނަށް ބަލާލެވުނީ ނިހާލުމެންގެ މޫނަށެވެ. އަހަރެން ދާންބޭނުންވާ ސަބަބު އެމީހުންނަށް އެނގޭތީވެ އެމީހުން އެއްޗެކޭނުބުނެ އިސްޖަހާލިއެވެ. ''ނޫން... މަންމަ ވަރަށްބޮޑަށް ބަލިވެގެން ހޮސްޕިޓަލުގައި ބާއްވާފައޮތީ.... އެހެންވެ އަހަރެން ބޭނުންވަނީ ވީހާވެސް އަވަހަކަށް އެކޮޅަށްދާން.'' އަހަރެން މާޔޫސްވެފައި އިނދެ ދޮގެއް ހެދީމެވެ. އަހަރެން ދިޔަޔަކަސް ނިހާލުމެންކައިރީގައި އަހަރެން މަޑުކުރުމަށް ބުނީމެވެ. އެމީހުން ޗުއްޓީ އެކޮޅުގައި ހޭދަކޮށްލާފައި އައުމަށް އެދުނީމެވެ. ނަމަވެސް އެމީހުން އެގޮތާއި އެއްބަސް ނުވިއެވެ. އެމީހުން ބޭނުންވީ އަހަންނާއިއެކު ދިޔުމަށެވެ. ''ދަރިފުޅު ބޭނުންގޮތެއް ނިންމާ... މާދަމާރޭ މިކޮޅުން ފުރާ ބޯޓެއްއެބައޮތް. ދަރިފުޅުމެން ދާން ބޭނުމިއްޔާ ތައްޔާރުވާތި.'' އުބޭދުބޭ އެހެން ބުނެފައި ކޮޓަރިޔާއި ދިމާލަށް ދިޔައެވެ. ދެދުވަސް ނުވަނީސް އަހަރެން ފުރާވާހަކަ ބުނުމުން އުބޭދުބޭ ހިންހަމަނުޖެހުނީ ކަންނޭގެއެވެ.

އެދުވަހަށްފަހު އަހަރެން ތޫއަށް ނުގުޅަމެވެ. ބޭނުންވީ އަހަރެން ނިންމިފަދައިން އޭނާގެ ދިރިއުޅުމުން ދުރަށްދިޔުމެވެ. ނަމަވެސް ތޫ އަހަންނަށް ވަރަށްގިނައިން ގުޅިއެވެ. އެތަކެއް މެސެޖެއްވެސް ކުރިއެވެ. އަހަރެން ކޮންމެ ފަހަރަކު މެސެޖް ކިޔާލާފައި ޑިލީޓްކޮށްލަނީއެވެ. އަހަރެން ކުޑަހުވަދޫން ފުރައިގެން އައީ ތޫއާއި ހަވާލުކުރުމަށް ކުޑަނޯޓްކޮޅެއް ނުހާއަތަށް ދީފައެވެ. އަހަރެން ހޯދަން ތޫބާ ކިޔާ ކުއްޖަކު އައިއްސިއްޔާ އެ ގަނޑުކޮޅު ހަވާލުކުރުމަށްއެދި ބުނެފައެވެ. އެގަނޑުކޮޅުގައި އަހަރެން ލިޔެފައިވާނީ ބޮޑުކަމެއް ޖެހިގެން އަހަރެން ރަށަށް ފުރަން ޖެހުނުވާހަކަ އެކަންޏެވެ. ނުހާ އަހަރެން ކައިރިން އިތުރު ސުވާލެއް ނުކޮށް އާއެކޭ ބުނާފަދައިން ބޯޖަހާލީއެވެ. ދިރިއުޅުމުގައި އަދި ތޫއާއި ކުރިމަތިލާންޖެހޭނެކަންވެސް އަހަންނަށް އެނގެއެވެ. ނަމަވެސް އަހަރެން މަސައްކަތްކުރާނީ ދެން ތޫއާއި ވާހަކަނުދައްކާވޭތޯއެވެ.

މެލޭޝިޔާގެ ކުއާލަލަމްޕޫރް އިންޓަނޭޝަނަލް އެއަރޕޯޓުގައި ބޯޓް ޖެއްސުމާއިއެކު އަހަރެން ދެލޯ ހުޅުވާލީމެވެ. ހީވީ އެތައް ދުވަސްތަކަކަށްފަހު ދެލޯ ހުޅުވާލިހެންނެވެ. ލަގެޖް ހިފައިގެން ބޭރަށް ނުކުތްއިރު ތިއްތަބެ އަހަރެން ބަލާ އައިސް ހުއްޓެވެ. ތިއްތަޔާއި ކުޑަމީހުން ފެންނަންނެތުމުން އަހަރެން އެވާހަކަ އެހީމެވެ. ތިއްތަބެ ބުނީ ކުޑަދެމީހުންވެސް ހުންއައިސްގެން އުޅެތީ ތިއްތައަށް ނާދެވުނީ ކަމަށެވެ. ތިއްތަބެ އައިސް އަހަރެންގެ ހަށިގަނޑަށް ރަނގަޅަށް ބަލާލާފައި ކަރުގައި އައްޖާސާލާފައި ބަލިވެހޭ ތިއުޅެނީ އަހާލިއެވެ. އަހަރެންގެ މޫނުމަތިން ތިއްތަބެޔަށް އެހެންހީވީ ކަންނޭނގެއެވެ. ހީވެދާނެވެ. އަހަރެންގެ ހަށިގަނޑު ކުރިޔާ އަޅާބަލާފައި ވަރަށް ބޮޑުތަން ހިއްކެވެ. ގަވައިދުން ނުކެވުމުގެ ސަބަބުން ކަމަށްވެސް ވެދާނެވެ. ނޫނީ ކަންކަމާއި މާބޮޑަށް ވިސްނާތީ ކަމަށްވެސް ވެދާނެވެ. އަހަރެން ފާޑަކަށް ނޫނެކޭ ބުނެފައި މިދުވަސްކޮޅު ކުޑަކޮށް ބަލިވެއުޅޭވާހަކަ ބުނީމެވެ. އަދި އޭރުވެސް އަހަރެންގެ ބޮލުގައި ރިއްސާވާހަކަވެސް ބުނީމެވެ.

ތިއްތަބެޔާއި ވާހަކަދައްކަމުންގޮސް ލަގެޖްތައްލާފައި އަހަރެންގޮސް ކާރުގެ ފަހަތު ޝީޓަށް އަރާފައި ހަމަޖެހިލީމެވެ. ތިއްތަބެ ކާރުދުއްވާލިއެވެ. ކާރުތެރޭގައި އަޑުމަޑުކޮށް ފަހުގެ އިނގިރޭސި ލަވަތައް ޖަހާފައި ހުއްޓެވެ. އަހަރެން ފޯނުނަގައި ފުރަތަމަވެސް ގުޅީ މަންމަޔަށެވެ. ނަމަވެސް ފޯނުނުނެގުމުން އަހަރެން ދެންގުޅީ ކުޑާއްތައަށެވެ. ގުޅިހާއިރުން ކުޑާއްތަ ފޯނުނެގިއެވެ. އަހަރެން މެލޭޝިޔާއަށް ދެވެނުވާހަކަ ބުނީމެވެ. ......................... (ނުނިމޭ)

Mulhi Umurahves Loabi Vaanameve...... (10)

މުޅި އުމުރަށްވެސް ލޯބި ވާނަމެވެ.... (ދިހަވަނަ ބައި)

(ނުވަވަނަ ބަޔާއިގުޅޭ)..............

ފެށުނީއްސުރެ އަހަންނަށް އަބަދުވެސް އެކިއެކި ކަންކަމާއި ގުޅިގެން ހުވަފެން ފެނެވެ. އަބަދުވެސް ހަގީގަތަށް ކަންތައްވަނީ އަހަންނަށް ފެންނަ ހުވަފެންތަކާއި އިދިކޮޅަށެވެ. އެއީ ހަގީގަތުގައި ވާގޮތްކަމެއް ނޫނީ އަހަންނަށް އަބަދުވެސް އެގޮތަށް ވިސްނޭތީ ވާގޮތެއް ކަމެއް ނޭގެއެވެ. އެނގޭހާވެސް އެއްޗަކީ އަހަންނަށް ހުވަފެނެއް ފެނިއްޖެނަމަ އަބަދުވެސް އަހަރެން ކުރިމަތިލާންޖެހޭނީ އޭގެ އިދިކޮޅެވެ. އަހަރެން މާޔޫސްވިއެވެ. މީހާ ފެންކަޅިވިއެވެ. އޭގެ މާނަޔަކީ ތޫއަހަރެންގެ ދެކެ ލޯބި ނުވުން ހެއްޔެވެ! ނޫނީ ތޫ އަހަރެންގެ ލޯބި ގަބޫލު ނުކުރުން ހެއްޔެވެ! ނޫނީ ތޫ އެހެންމީހަކު ދެކެ......... އަހަރެންގެ ސިކުޑިއަށް އަރާ ފައިބަމުންދިޔަ ވާހަކަތައް އަހަރެން ހުއްޓުވީމެވެ. ތޫ އެހެން މީހެއްގެ މީހަކަށް ވެދާނެކަމަށް އަހަރެން ޚިޔާލުވެސް ކުރާކަށް ބޭނުންނުވާތީއެވެ.

ހުވަފެނުގެ ޚިޔާލާއި ދުރަށް ދިޔުމަށް އަހަރެން އެނދުން ތެދުވެގެންގޮސް ކުޑަދޮރުކައިރިޔަށް ޖެހިލީމެވެ. ސާފު ވައިރޯޅިތައް މޫނުގައި ބީހިބީހި ހުއްޓެވެ. އަހަރެންގެ ނަޒަރު ހުއްޓުނީ ގޯތިތެރޭގައި ހުރި ބޮޑު ހިރުދުގަހުގައި އަޅުވާފައިވާ އުނދޯއްޔެއްގައި އޮތް އެއްކަލަ އަންހެން ކުއްޖާއަށެވެ. ނުހާއަށެވެ. ނުހާ ދެލޯމަރައިގެން އޮތެވެ. ނިދާފައިކަމެއް ނޫނީ ކަމަކާއި ވިސްނަން ދެލޯމަރައިގެން އޮތީކަމެއް ނޭނގެއެވެ. އެދިމާލަށް ބަލަން އަހަންނަށް ކުޑައިރުކޮޅަކު ހުރެވުނެވެ. ކީއްވެގެން ކަމެއް ނޭނގުނެވެ. އަހަރެން ބަލަންހުއްޓާ ނުހާ ކުއްލިއަކަށް ދެލޯ ހުޅުވާލިއެވެ. އެވަގުތު އޭނާއަށް އަހަރެން ފެނުނެވެ. އަހަރެން ވަގުތުން އެތެރެއަށް ޖެހިލީމެވެ.

ފާރިޝްއާއި ސަމާހުއާއި ދެމީހުން ޓީވީބަލަން ތިއްބެވެ. ނިހާލުނެތުމުން އަހަރެން އެކަމާއި ސުވާލުކުރުމުން އެނގުނީ އޭނާ އުބޭދުބޭގެ ސަމާހުއާއިއެކު ބޭރަށް ދިޔަކަމެވެ. އަހަރެން އަވަސްވެގަތީ މެންދުރުނަމާދަށް ބަންގިދޭންވާއިރަށް ތައްޔާރުވެލައިގެން މިސްކިތަށް ދިޔުމަށެވެ. ނަސީބަކުން އުބޭދުބޭމެން ގެކައިރީގައި މިސްކިތެއް ހުރެއެވެ. އަހަރުމެންދިޔައީ އެމިސްކިތަށެވެ. އަހަރުމެން ތިންމީހުން މިސްކިތުން ފޭބިއިރު ނިހާލުމެން ސައިކަލުންއައިސް ގޭދޮށަށް މަޑުކުރީއެވެ. އަހަރުމެން ފެނިފައި އެމީހުން ބޭރުގައި މަޑުކުރިއެވެ. ނިހާލު ކައިރީގައި ދިޔައީ ކޮންތާކަށްހޭ އެހުމުން ބުނީ ފޫހިވެގެން ރަށުތެރެ ބަލާލަން ދުއްވާލަން ދިޔައީ ކަމުގައެވެ. އޭނާ ބުނި ގޮތުގައި އެރަށް ވަރަށް ރީއްޗެވެ. އަދި ފުދޭވަރަކަށް ބޮޑުވެސްމެއެވެ.

މެންދުރުގެ ކެއުމަށްފަހު އަހަރުމެން ފިނިކޮށްލަން ބޭރަށް ނުކުތީމެވެ. އުބޭދުބޭމެންގޭ ކުރިމަތީގައި ބޮޑު ގަސްފީންޏެއް އޮވެއެވެ. އެތާގައި ހޮޅުއައްޓަކާއި ޖޯލިތަކާއި އަދި ގަސްތަކުގައި އެކި ވަރުގެ އުނދޯލިތައް އަޅުވާފައި ހުއްޓެވެ. އަހަރުމެން ދިޔައިރުވެސް އެތާގައި އަހަރުމެން ވަރުގެ ދެތިން ޒުވާނަކު އުޅުނެވެ. އެމީހުންނާއި ވާހަކަދައްކައި އަހަރުމެން ރަޚްމަތްތެރިވެސް ވީމެވެ. އެތާގައި އަހަރުމެން ތިއްބާ ނުހާ އޭނާގެ ދެތިން ރައްޓެހިންނާއިއެކު ގެއާއި އަރާ ހަމަވިއެވެ. ނުހާ ބުނިއެއްޗަކަށް އޭނާގެ ރައްޓެހިން އަހަރުމެންނަށް ބަލާފައި ހިނިތުންވެލިއެވެ. ބޭރުގައި އެމީހުން އިރުކޮޅަކު ވާހަކަދައްކަން ތިބެފައި އެހެންކުއްޖަކު އައުމުން ގޭތެރެއަށް ވަނެވެ. އެމީހުން މަޑުކުރީ އެކުއްޖާ އަންނަންދެން ކަންނޭގެއެވެ. ބޭރުގައި މަޑުކުރި ވަގުތުކޮޅުގައި ނުހާ އަހަންނަށް ބަލަމުންދިޔަކަން އަހަންނަށް ފާހަނގަ ކުރެވުނެވެ. އެއީ އަހަރެން ބަލާލާ ކޮންމެފަހަރަކު ނުހާގެ ނަޒަރު ދިމާވާތީއެވެ. ނުހާއަށްވެސް ހީވާނީ އެހެންކަންނޭގެއެވެ. ވަންނަމުންވެސް ނުހާ ފަސްއެނބުރި އަހަންނަށް ބަލާލިއެވެ. އެވަގުތު ކައިރީގައި އިން ފާރިޝް އަހަރެންގެ ފައިގައި ކޮއްޓާލިއެވެ. ''އެމަންޖެ ހާދަވަރަކަށޭ ކަލެޔަށް އެބަލަނީ....'' ފާރިޝް މިހެންބުނީ އެތާގައި ދެންތިބި މީހުންނަށް ނީވޭވަރަށެވެ. ''ހޫމް.... ތީ ކަލެޔަށް ހީވާގޮތް....'' އަހަރެން ނޭނގޭ ކަމަށް ހަދާލީމެވެ. ހީނލާފައި ފާރިޝް އިތުރު އެއްޗެކޭ ނުބުނެ އުނދޯލިގައި އޮށޯތެވެ. އަހަރެންވެސް އޮށޯންނަމުން ދެލޯމަރާލީމެވެ. އޭރުވެސް ފެނުނު ހުވަފެނުގެ ސަބަބުން އަހަންނަށް އުނދަގޫތަކެއް ވަމުންދިޔައެވެ.

ހަވީރު ހަތަރުގަޑި ބައިވިއިރު އަހަރުމެންތިބީ ތޫމެންގޭގައެވެ. ތޫ އޭނާގެ ބައްޕަޔާއިއެކު އަހަރުމެން ބަލާއައެވެ. އަހަރުމެން އެގެއަށް ދިޔައީ ފައިމަގުގައެވެ. ތަންކޮޅެއް ދުރުނަމަވެސް ތޫ ފެންނަން ހުރުމުން ދުރުކަމެއް އިޙުސާސު ނުވިއެވެ. ތޫގެ ގެއާއި އަރާ ހަމަވިއިރު އަހަންނަށް ހީވީ ވަރަށް އަވަހަށް އާދެވުނުހެންނެވެ. ތޫގެ މަންމަޔާއި ބައްޕަ ވަރަށް ހެވެއެވެ. އަހަންނަށް އެމީހުންނާއިއެކު ގާތްކަމެއް އިޙުސާސު ކުރެވުނެވެ. އެގޭގައި އުޅެފައި އަހަރުމެން ގެއަށް އަންނަން މިސްރާބުޖެހީ އަނދިރިވާން ކައިރިވެފައި ވަނިކޮށެވެ. އަހަރުމެންނާއިއެކު ތޫއައެވެ. އަހަރެން އެއްބަސް ނުވުމުންވެސް ތޫ އަހަރުމެންނަށް މަގުއޮޅިދާނޭ ކިޔާފައި އައީއެވެ. ދުލުން އެހެން ބުނެވުނަސް އަހަރެން ހުރީ ވަރަށް އުފާވެފައެވެ. ތޫއާއިއެކީ ވަގުތު ހޭދަކުރަން ލިބުމުންނެވެ. އަހަރެން ބޭނުންވީ އަންނަ މަގުމަތީގައި ތޫކައިރީގައި އަހަރެންގެ ހިތުގެ ހާލަތު ބަޔާންކުރުމެވެ. އެއީ ވަގުތުވެސް ރަނގަޅުކަމުންނެވެ. ވީވެސް އެހެންނެވެ. ފާރިޝްމެން އަހަންނަށް ބަލާފައި އެއްލޯ މަރާލަމުން އެމީހުން ހަލުވިކަމާއިއެކު ކުރިޔަށް ހިނގައިގަތެވެ. އަހަންނާއި ތޫއަށް ވަގުތުދެމުންނެވެ. ތޫ އެމީހުންނަށް ގޮވާވެސް ހެދިއެވެ. އަހަންނަށް ހުރެވުނީ ފާޑަކަށް ތޫއަށް ބަލަހައްޓައިގެން ހިނިއައިސްފައެވެ. ތޫ އަހަންނަށް ބަލާލުމާއިއެކު ވަގުތުން އަހަރެން އެހިނި އޮއްބާލީމެވެ. ކަމެއް ސިއްރުކުރާ ފަދައިންނެވެ.

އަހަރުމެން ދެމީހުން ވާހަކަދައްކަމުން ގޮސް ތޫ އަހަރެން ކައިރީގައި އޭނާ ވަރަށް ބޮޑު ވާހައެއް ބުނަން ބޭނުންވެފައިވާ ވާހަކަ ބުންޏެވެ. އަހަރެންގެ ހިތް ވަގުތުން ތެޅިގަތެވެ. ކުރިޔަށްއެޅި ފިޔަވަޅުވެސް ހުއްޓުނެވެ. ތޫއަށް ބަލަހައްޓައިގެން އެއްޗެއް ނުބުނެ އަހަންނަށް ހުރެވުނެވެ. ތޫ އަހަރެންގެ ކުރިމައްޗަށް ހުއްޓުނެވެ. ތޫ ބުނަންބޭނުންވަނީ ކޮންވާހަކައެއްތޯ އަހަރެންގެ ހިތަށްއެރިއެވެ. ވަގުތުން އަހަރެންގެ ހަނދާނަށް އައީ ފެނުނު ހުވަފެނެވެ. އެވަތު ހިތުގައި ނޭނގޭ ރިހުމެއް އުފެދުނެވެ. ''އަސްލު އެއީ ސަޕްރައިޒެއް.'' ތޫގެ ދުލުން ނުކުންނަ ކޮންމެ ޖުމްލައަކުން އަހަރެންގެ ހިތުގައިވި ރިހުން ބޮޑުވަމުންދިޔައެވެ. ތޫގެ ވާހަކަތަކުން އަހަންނަށް ވިސްނެނީ އެހެންއެއްޗެއް ކަމުގައިވީތީއެވެ. ''ސަޕްރައިޒް.... ކޮންކަމެއް؟'' އަހަރެން އިތުރަށް ސުވާލުކުރީމެވެ. ''އަދިފަހުން. އަހަރެން މިރޭ ގެއަށް ދިޔުމުގެ ކުރިން އެސަޕްރައިޒް ދޭނަމޭ...'' ހީނލަމުން ތޫ ކުރިޔަށް ހިނގައިގަތެވެ. ތޫ ދޭންއުޅެނީ ކޮން ސަޕްރައިޒެއްތޯ ޚިޔާލުގައިހުރެ އަހަރެންވެސް ތޫގެ ފަހަތުން ހިންގައިގަތީމެވެ. އަދި އޭނަޔާއި ހިނގުން އެއްވަރުކުރީމެވެ. އެޚިޔާލުގައި ވުމުން އަހަރެން ތޫ ކައިރީގައި ބުނަން ބޭނުންވި ވާހަކަވެސް ނުބުނެވުނެވެ. ބުނާނެ ހިތްވަރު ނުލިބުނީއެވެ. ބޮޑަށް އަހަރެން ބަލަންބޭނުންވީ ތޫ ދޭންއުޅޭ ސަޕްރައިޒެއް ހޯދުމަށެވެ. އަހަރެން އޭނަޔާއި ވަރަށް ސުވާލު ކުރީމެވެ. އެވާހަކަ އޮޅުންފިލުވުމަށެވެ. ނަމަވެސް އޭނާގެ ފަރާތުން ވަކިޖަވާބެއް ނުލިބެނީސް އަހަރުމެންނަށް ގެއާއި ހަމަޔަށް އާދެވުނެވެ. ތޫ އެދުނީ އަހަރެން ކައިރީގައި ކުޑައިރުކޮޅަކު ބޭރުގައި މަޑުކޮށްލަދިނުމަށެވެ.

ފިކުރުގައި ހުރެގެންގޮސް އަހަރެން ޖައްސާލީ ކުރިމަތީގައި ހުރި ޖޯލިފަތީގައެވެ. ކަންމަތީގައި ދިއްލާފައިހުރި އޮރެންޖް ބޮކީގެ އަލިކަން މުޅި އެހިސާބަށް ފެތުރިފައި ހުއްޓެވެ. ނަމަވެސް އެއަލިކަމުގެ ތެރެއިން ގަސްތަކުގެ ހިޔަނި އެޅިފައިވުމުން ބިރުވެރި އަނދިރިކަމެއް އެތާގައި ހުއްޓެވެ. ތޫ ހުރީ އޭރު ފޯނެއްގައެވެ. ހީނލާފައި ތޫ ފޯނުން ވާހަކަދައްކަމުން ދިޔައިރު އެހިނިތުންވުންވެސް އެވަގުތު އަހަންނަށް އުނދަގޫ ކުރިއެވެ. އެކޮޅުން ވާހަކަދައްކަނީ ކާކުކަން ނޭނގެތީއެވެ. ފޯނު ބާއްވަމުން ތޫ އައިސް އުނދޯލީގައި ޖައްސާލިއެވެ. އަހަރެން އަނެއްކާވެސް ތޫކައިރިން ދޭންއުޅޭ ސަޕްރައިޒްގެ ވާހަކަ އަހާލީމެވެ. އަހަންނަށް އެކަމެއް ބަލާލަން ކެތްމަދުވެފައިވާ ކަހަލައެވެ. ތޫ އެދުނީ އަދި މަޑުކުރުމަށެވެ. ވަގުތަކަށްފަހު ވަގުތަކަށް އަހަރެންގެ ހިތުގެ ތެޅުން ބާރުވަމުންދިޔައެވެ.

މާގިނައިރުތަކެއްނުވެ އެތަނަށް ސައިކަލުގައި ފިރިހެން ކުއްޖަކުއައެވެ. ތޫ ފެނުމާއިއެކު އެކުއްޖާ ހީނލިއެވެ. ތޫވެސް ހިނިތުންވެލަމުން އުނދޯލިން ތެދުވެގެންގޮސް އެކުއްޖާ ކައިރިޔަށް ހުއްޓުނެވެ.  އެއީ ކަޅު އެހެނަސް ބަލާބެލުމަށް ރީތި ކުއްޖެކެވެ. އެކުއްޖާ ކައިރީގައި ހުއްޓެމުން ތޫ އަހަންނަށް ބަލާލިއެވެ. އަދި ހިނިތުންވެލިއެވެ. އަހަންނަށް ހުރީ ވާނުވާ ނޭނގިފައެވެ. އެހާވަރަށް ހާސްވެސް ވެފައެވެ. އެކުއްޖާއާއިއެކު ތޫ ހުރިތަން ފެނުމުންނެވެ. އަހަންނަށް ތެދުވެވުނެވެ. ސުވާލުގެ ނަޒަރަކުން އަހަރެން ދެމީހުންނަށް ދެފަހަރު ބަލަމުން ގެންދިޔައީމެވެ. އަހަރެންގޮސް ތޫމެން ކައިރިޔަށް ހުއްޓުނީމެވެ. އެއާއިއެކު އެކުއްޖާ އަހަންނާއި ސަލާމްކުރަން އަތްދިއްކޮށްލިއެވެ. ''ހައި... މިއީ އެޑަމް. ތިއީ އަޔާންދޯ...'' އަހަރެން އާއެކޭ ބުނުމުގެ ގޮތުން ބޯޖަހާލީމެވެ. އަދި ގަދަކަމުން ހިނިތުންވެލަމުން އެޑަމްއާއި ސަލާމްކުރީމެވެ. އަހަންނަށް ބަލާލެވުނީ ތޫއަށެވެ. އަހަރެންގެ ބެލުމުން ތޫއަށް އަހަރެންގެ ހިތުގައި ވާއެއްޗެއް އެނގުނީ ކަންނޭގެއެވެ. ''މިއީ އަހަރެން ދޭންއުޅުނު ސަޕްރައިޒަކީ. އެޑަމްއަކީ އަހަރެންގެ ބޯއިފްރެންޑް....'' ތޫ ވަރަށް އުފާވެފައި ހީލަމުން ބުންޏެވެ. ''އެޑަމް. މިއީ އަހަރެންގެ އެންމެ ގާތް އެކުވެރިޔާ. އަޔާން.'' ތޫ އެޑަމްއަށް ބަލާލިއެވެ. އަހަންނަށް ހީވީ އަހަރެންގެ ކަންފަތަށް ތޫނުއެއްޗެއް ހެރުނުހެންނެވެ. އަހަންނަށް ބުނާނެއެއްޗެއް ނޭނގުނެވެ. ނޭވާ އަރުތެރޭގައި ބެދުނު ކަހަލައެވެ. މޫނުމައްޗަށް އަނދިރިވިހެންވެސް ހީވިއެވެ. އަހަރެންގެ މޫނުމަތީގެ ކުލަވަރުން އެޑަމްއަށް އެއްޗެއް ވިސްނިދާނެހެން ހީވުމުން އަހަރެން ކުރިޔަށްވުރެ ބޮޑަށް ގަދަކަމުން ހީލީމެވެ. ''ތޫ ނުވެސް ބުނަމެއްނު އެޑަމްގެ ވާހަކައެއް. ކޮންއިރަކު ހިނގި ކަމެއްތީ؟'' ހިތުގައި އަޅަމުންދިޔަ ވޭން ފޮރުވަމުމަށް ބޭރުފުށުން އަހަރެން ހީލަމުން އެމީހުންނާއި އެއްވެސްކަމެއް ނުވާފަދައިން މުޚާތަބްކުރަން މަސައްކަތް ކުރީމެވެ. ''އަޔާން އެއްފަހަރުވެސް ނާހަމެއްނު. އެޑަމްއާއި އަހަރެންގެ ގުޅުމަށް މިހާރު ދެއަހަރު ވެދާނެ. އެޑަމް އުޅެނީ މިކޮޅުގައި.'' ތޫ އަހަންނަށް ބަލާލުމާއިއެކު އަހަރެން ވަގުތުން އެޑަމްއަށް ބަލާލީމެވެ. އެލޮލާއި ލޯ ހަމަނުކުރަންވެގެންނެވެ. އަހަރެން އެހާ ހިތްދަތިވެފައި ހުރިއިރުވެސް ތޫގެ މުނުގައިވި އުފާވެރިކަން ފެނިފައި ހިތަށް ހިންހަމަޖެހުން ލިބުނެވެ. ފަހަރުގައި ލޯތްބަކީ އެއީއެވެ. އަހަރެން ބޭނުންވަނީ އަހަރެންގެ އުފަލަށްވުރެ ތޫގެ ހިންހަމަޖެހުމެވެ. އެދެމީހުން ހީނހީނފައި ވާހަކަދައްކަމުން ދިޔައެވެ. އަހަރެން ފެންކަޅިވެފައި ބަލަން ހުރީމެވެ. އެމީހުން އަހަންނަށް ބަލާލުމާއިއެކު ގަދަކަމުން ހީލަމުންނެވެ. އެމީހުންގެ ވާހަކައިގައި ބައިވެރިވަމުން ހަލުވިކޮށް އެސްފިޔަޖަހާލަމުން އަހަރެންގެ ލޮލަށް ޖަމާވަމުންދިޔަ ކަރުނަތައް ހިފަހައްޓަމުން ދިޔައީމެވެ. ނިހާލުމެން ގެއަށްއައީ އަހަރުމެން އެތާ ތިއްބައެވެ. އެމީހުންފެނުމާއިއެކު އަހަންނަށް ކުޑަ ހިންހަމަޖެހުމެއް ލިބުނެވެ. އެމީހުން އެތަނަށް އައިކަން ނަސީބޭ އަހަރެންގެ ހިތަށްއެރިއެވެ. ......................... (ނުނިމޭ)