Mulhi Umurahves Loabi Vaanameve...... (07)

މުޅި އުމުރަށްވެސް ލޯބި ވާނަމެވެ.... (ހަތްވަނަ ބައި)

(ހަވަނަ ބަޔާއިގުޅޭ)..............

އެހެންވެ ދެވަނަފަހަރަށްވެސް އަހަރެން ތޫދެކެ ލޯބިވާވާހަކަ ބުނީމެވެ. ތޫއަހަރެންގެ މީހަކަށް މުޅިއުމުރަށް ހަދަން ބޭނުންވާ ވާހަކަ ބުނީމެވެ. ތޫއާއި އެންމެ ފުރަތަމަ ބައްދަލުވީ ދުވަހުން ފެށިގެން ހުރިހާ ވާހަކައެއްވެސް ކިޔައިދިނީމެވެ. އަހަންނަށް ހީވީ އެއްނޭވައިން ހުރިހާ ވާހަކައެއް ކިޔައިދެވުނުހެންނެވެ. ހިތް އަވަސްވެފައިވާލެއް ބޮޑުކަމުންނެވެ. ލޯބިވާވާހަކަ ދުލާއިހަމަޔަށް ގެނެވުމުން އަހަރެންގެ ހިތަށް ވަރަށް ހިންހަމަޖެހުން ލިބުނެވެ. ނަމަވެސް އެހާވަރަށް ހިތް ނުތަވަސްވެސް ވިއެވެ. ތޫގެ ޖަވާބެއް ނޭނގޭތީއެވެ. އަހަރެން އިންތިޒާރުކުރަމުން ދިޔައީ ތޫގެ ޖަވާބަކަށެވެ.

އަހަންނަށް ސިހިފައި ލޯހުޅުވާލެވުނީ ފްލައިޓަށް އެރި ލޮޅުންގަނޑަކުންނެވެ. އަހަރެން ބޭރުބަލާލީމެވެ. އަނދިރިކަމުން ތަނެއް ފެންނަވަރުނުވިޔަސް ގަދަޔަށް ވިދަމުންދިޔަކަން އެނގުނެވެ. ވިދުވަރުގެ އަލިން ކޮޅިގިނަވެފައި ވާރޭވެހެމުން ދިޔަކަންވެސް އަހަންނަށް އެނގުނެވެ. އެވަގުތު ކެބިންކުރޫއެއް އައިސް އަހަރެން ކައިރީގައި އެއްވެސް އެއްޗެއް ބޭނުންތޯއޭ އަހާލިއެވެ. އަހަރެން ހަމައެކަނި ފެއްތައްޓަކަށް އެދުނީމެވެ. ގަޑިބަލާލުމުން ފްލައިޓް ޖައްސަން ކައިރިވެއްޖެކަން އަހަންނަށް އެނގުނެވެ. މާގިނައިރުތަކެއްނުވެ ފްލައިޓް ލަންކާގެ ބަންޑާރަނައިކް އެއަރޕޯޓުގައި ޖެއްސިއެވެ. މެލޭޝިޔާއަށް ދާން ފުރުންއޮތީ އަދި ތިންގަޑިއިރު ފަހުންކަމަށް ވުމާއިއެކު ފަސިންޖަރުންނަށް ޖެހުނީ ލޮބީގައި މަޑުކޮށްލާށެވެ. އެތާގައި އަހަރެން ބޭރަށް ނޮގޮސް މަޑުކޮށްލީ އަހަރެން އިތުރުކަމެއް ކުރާހިތް ނުވާތީއެވެ. ބަނޑުހައިވިޔަސް އަހަރެންހުރީ ކާހިތް ނުވެފައެވެ. އެހެންމީހުން އެކިއެކި ކަންކަމުގައި ބޭރަށް ނުކުމެ އުޅުނެވެ. ލޮބީ ފިނިކަމުން އަހަރެން ހުރީވެސް ކުޑަކޮށް ފިނިވެފައެވެ. އަހަރެން ގޮސް ޖައްސާލީ އެންމެ ފަހަތުގައި ހުރި ސޯފާބަރީގައެވެ. ކުރާނެ އިތުރު ކަމެއް ނެތުމާއިއެކު އަހަރެން ލެޕްޓޮޕް ނަގައިގެން ހުޅުވާލީ ވަގުތު ކުރުކޮށްލުމުގެ ގޮތުންނެވެ. ނަމަވެސް ޑެކްސްޓޮޕްގައި އިން ތޫގެފޮޓޯ ފެނުމާއިއެކު އަހަރެން ހުއްޓުން އެރިއެވެ. އިތުރުކަމެއް ކުރާހިތެއް ނުވިއެވެ. އެރީތިކަމަށް ހިތާއިހިތުން ތަޢުރީފުކުރަމުން އެމޫނަށް ބަލަހައްޓައިގެން އަހަރެން އިނދެވުނެވެ. އިނދެވުނީ ކިހާއިރެއް ވަންދެން ކަމެއްވެސް ނޭނގެއެވެ. އަހަންނަށް ހީވީ ތޫ އަހަރެންގެ ކުރިމަތީގައި ހެވިލާފައި އަހަންނާއި ދިމާލަށް ބަލަހައްޓައިގެން އިންހެންނެވެ. ހަގީގަތެއް ނޫންކަން އެނގުނީ ކައިރިންދިޔަ  ކުޑަކުއްޖަކު ފައިގައި އަޅާފައި ވެއްޓުމުންނެވެ. ވެއްޓުނުހާ އަވަހަށް އެކުއްޖާ ތެދުވެގެން ހިނގައިގަތެވެ. އެކުއްޖާގެ މީހުން ދުރުގައި ހީ...ހީފައި ބަލަންތިއްބެވެ. އަހަރެންގެ މޫނަށްވެސް ކުޑަ ހިނދުކޮޅަކަށްނަމަވެސް ހިތުންވުމުގެ އަސަރު ފާޅުވިއެވެ. އެކުޑަ މައުސޫމު ކުއްޖާގެ ހަރަކާތްތައް ފެނުމުންނެވެ. އެއަށްފަހު އަހަރެން ފެންކަޅިވިއެވެ. ތޫއަށް ބަލާލުމުންނެވެ. އަހަރެންގެ ފެންކަޅިވެފައިވާ މޫނުން އަހަރެންގެ ހިތުގެ ހާލަތު ރީއްޗަށް ފެންނަމުންދިޔައެވެ. އަހަރެން މަޑުމަޑުން ތޫގެ މޫނުގައި އަތް ކާއްތާލީމެވެ. ތުންފަތާއިހަމަޔަށް އަތްގެނެސް އަހަންނަށް ހުއްޓެވުނެވެ. މަޑު ފިޔާތޮށިކުލައިގެ އެތުންފަތުގައި އަހަންނަށް ހީވީ ހަގީގަތުގައިވެސް އަހަންނަށް ބީހެވުނުހެންނެވެ. އަހަރެންގެ ހުރިހާ އިސްތައްޓެއް ކޮޅަށްޖެހުނެވެ. ހިތުގެ ވިންދު އަވަސްވިއެވެ. އަހަރެންގެ ހަނދާނަށް އައީ ތޫއާއިއެކު އަހަރެން ހޭދަކުރި އުފާވެރި ވަގުތުކޮޅެއްގެ ހަނދާނެވެ. އެއީ ދުވަހަކު އަހަރެން ހިތުން ފިލައިގެން ނުދާނޭ ވަގުތުކޮޅެކެވެ. ހަމައެކަނި އެވަގުތުކޮޅުގެ ހަނދާނުގައިވެސް އަހަރެން މުޅިއުމުރު ހޭދަކޮށްލަފާނަމެވެ. އެއީ އަހަރެންގެ ހަޔާތުގައި މިހާތަނަށް ލިޔެވިގެންދިޔަ އެންމެ ފޮނި ހަނދާނެވެ. އަދި ކުރެވުނު އެންމެފޮނި އިހުސާސްވެސްމެއެވެ.  

ތޫގެ ޖަވާބެއް ލިބޭތޯ އަހަރެން ފަސްވަރަކަށް މިނިޓްވަންދެން އިނީމެވެ. އޭރު އަހަރެންގެ ހިތް އާދަޔާ ޚިލާފަށް ތެޅެމުންދިޔައެވެ. އިމްތިޚާނެއް ބޯމަތިވުމުން ކުރާކަހަލަ އިޙުސާސެއް އަހަންނަށް ކުރެވެމުންދިޔައެވެ. ހިތާއިހިތުން ތޫ އަހަރެންގެ ލޯބި ގަބޫލުކުރުމަށްއެދި އަހަރެން ދުޢާވެސް ކުރީމެވެ. ތޫގެ ފަރާތުން ލިބުނު ހަމަހިމޭކަމުން އަހަރެންގެ ހިތުގައި ނޭނގޭ ބިރުވެރިކަމެއް އުފެދުނެވެ. އަހަރެން މަޑުމަޑުން އެނބުރި ތޫއަށް ބަލާލީމެވެ. ތޫއިނީ ލެނގިލައިގެން އިން ދަނގަޑުގައި ބޯޖައްސާލައިގެން ދެލޯމަރައިގެންނެވެ. އެމޫނުމަތިން އެއްވެސްކަހަލަ ހާސްކަމެއް، ނުތަނަވަސް ކަމެއް އަދި ހިންހަމަނުޖެހުމުގެ އަސަރެއްވެސް ފެންނާކަށް ނެތެވެ. އަހަރެން އިރުކޮޅަކު ތޫއަށް ބަލަންއިނީމެވެ. އިނދެފައި މަޑުމަޑުން ތޫއަށް ގޮވާލީމެވެ. ތޫގެ ފަރާތުން އެއްވެސް ޖަވާބެއް ނުލިބުނެވެ. އަހަރެން ދެވަނަފަހަރަށްވެސް ގޮވީމެވެ. ޖަވާބެއް ނުލިބުނެވެ. ދެން އަހަރެން މަޑުމަޑުން ތޫގެ ކޮނޑުގައި ހިފާ ތަޅުވާލީމެވެ. ތޫއިނީ ނިދާފައެވެ. އަހަންނަށް ފުންނޭވާއެއްލެވުނެވެ. އަދި އެހާމެ މާޔޫސްވެސްވިއެވެ. އަހަރެން ދެއްކި އެއްވެސް ވާހަކައެއް ތޫއަށް އަޑުނީވުމުންނެވެ. އެހާމެ ރަނގަޅު ވަގުތެއްގައި، އެހާމެ މަސައްކަތުން ހިތްވަރުކޮށްފައި ހިތުގައިވާ ހުރިހާ އެއްޗެއް ބުނެވުނުއިރު އަޑުއިއްވަން ބޭނުންވިމީހާއަށް އެއްވެސްއެއްޗެއް އަޑެއްނީވުނެވެ. ތަޤުދީރު އަހަންނާއި ކުރަނީ ކޮންކަހަލަ ސަމާސާއެއްބާއޭ އަހަރެންގެ ހިތަށް އެރިއެވެ. އަހަރެންގެ ނަސީބާއިމެދު އަހަރެން ދެރަވިއެވެ. ދެން އެފަދަވަގުތެއް ލިބޭނެބާވައޭ އަހަންނަށް ހިތާއިހިތާއި ސުވާލުކޮށްލެވުނެވެ. އަހަންނަށް ބަލާލެވުނީ ދިމާކުރިމަތިން ފެންނަން ހުރި ހަނދަށެވެ. އެވަގުތު ހަނދު ވިލާކޮޅަކާއި ނިވާވެލިއެވެ. ހަނދުވެސް އަހަރެންގެ ނަސީބާއިމެދު މަލާމަތްކުރަމުން ފިލީބާއޭ އަހަރެންގެ ހިތަށްއެރިއެވެ.

މާޔޫސްވެފައިވާ ނަޒަރަކުން އަހަރެން އަނެއްކާވެސް ތޫއަށް ބަލާލީމެވެ. ނިދާފައިވާއިރު އެމައުސޫމު މޫނުގެ ރީތިކަން ދެގުނައަށް ރީއްޗެވެ. އަހަރެންގެ މޫނުމަތިން މާޔޫސްކަން ފިލައިގެންދާކަށް މާގިނަވަގުތެއް ނުނެގިއެވެ. އެއަށްވުރެ އެމޫނުގެ ޖާދޫ މާވަރުގަދައެވެ. އަހަރެން ތޫއަށް ބަލަހައްޓައިގެން އިންދާ ތޫ ވެއްޓެން އުޅޭހެން ދެފަހަރަކު ހީވިއެވެ. އެގޮތަށް ވެއްޓި ތޫގެ އަރާމު ނިދިގަނޑު ހަލާކުވާކަށް އަހަރެންގެ ހިތެއް ނޭދުނެވެ. އެހެންވެ ނުކެރިފައި ހުރެވެސް އަހަރެން މަޑުމަޑުން ކައިރޔަށް ޖެހިލާފައި ތޫގެ ބޯގެނެސް އަހަރެންގެ ކޮނޑުމަތީގައި ބާއްވާލީމެވެ. ތޫއަށް ހޭނުލެވުނުކަން ނަސީބެވެ. އެހެންނޫންނަމަ އެފަދަ އުފާވެރި ވަގުތުކޮޅެއް ތޫއާއިއެކު ހޭދަކޮށްލަން ނުލިބުނީހެވެ. ތޫ ހަމަޖެހިލައިގެން ރީއްޗަށް ނިދާލާފައި އޮތެވެ. ގައިމަތީގައި އަޅާފައިވާ ފޮތިގަނޑުން ބައެއް ނެގިފައި އޮތުމާއިއެކު އަހަރެން އޯގާތެރިކަމާއިއެކު އެނަގާ ތޫގެ ހަށިގަނޑުގައި އޮޅާ ރަނގަޅަށް ނިވާކުރީމެވެ. ފިނިވެގެންވެސް ތޫގެ އަރާމު ނިންޖަށް އުނދަގޫ ވެދާނެތީއެވެ. އަހަންނަށް ބަލާލެވުނީ ތޫގެ މޫނަށެވެ. ނިދީގައިވެސް އެމޫނުމަތިން ހިނިތުންވުމުގެ އަސަރު ފާޅުވާން ހުއްޓެވެ. އަހަންނަށް ހިތާއިހިތުން އެހިތްގައިމުކަމަށް ތަޢުރީފުކޮށްލެވުނެވެ. އެހާކައިރިން ތޫގެ މޫނުފެނުމާއިއެކު އަހަރެން ގައިން ހީބިހިނެގިއެވެ. ބުނެދޭން ނޭނގޭ ކަހަލަ ފޮނި އިހުސާސްތަކެއް ކުރެވެމުންދިޔައެވެ. އެއިޙުސާސްތައް ކޮންޓްރޯލް ކުރަންވެސް އުނދަގޫވިއެވެ. ނުވާންވީ ކީއްވެހެއްޔެވެ؟ އަހަރެން ހިތާއި ފުރާނައިން ލޯބިވާ ފަރިކަމަނާ އޮތީ އަހަރެންގެ ކޮނޑުމަތީގައި އަރާމު ފުންނިންޖަކުން ނިދާފައެވެ. އޭނާގެ ހަށިގަނޑުވަނީ އަހަރެންގެ ހަށިގަނޑާއި ޖެހިފިތިފައެވެ. ވައިރޯޅިއަކަށްވެސް އެދޭތެރެއިން ނުދެވޭހާ ވަރަށެވެ. އެހަށިގަނޑުގެ ލުއިމީރުވަސް އަހަރެންގެ ނޭފަތުގައި ޖެހިޖެހި ހުއްޓެވެ. ބޭއިޚްތިޔާރުގައި އަހަންނަށް ތޫގެ މޫނުމަތީގައި ވަޔާއިއެކު ބީހެމުންދިޔަ ކުރުއިސްތަށިތައް އެއްފަރާތް ކޮށްލެވުނެވެ. އެއާއިއެކު އެރީތިކަމަށް ގެއްލިފައި އިނދެ މަޑުމަޑުން އަހަންނަށް އެރީތި ދޮންޖަންބެއްފަދަ ކޯތާފަތުގައި އަތުގެ ނުފުށުން ބީހިލެވުނެވެ. އެވަގުތު ތޫ ކުޑަކޮށް ތެޅިލިއެވެ. އަހަންނަށް ކުރެވުނުކަންތައް އިހުސާސްވީ ދެނެވެ. ވަގުތުން އަހަރެން އަނެއްފަރާތަށް އެނބުރުނީމެވެ. އަހަރެން ވަރަށް ލަދުގަތެވެ. އެހާމެ ދެރަވެސްވިއެވެ. ތޫގެ ހުއްދަޔާއިނުލައި އަހަންނަށް އެމޫނުގައި ބީހިލެވުމުންނެވެ. އެއީ ގޯހެކެވެ. އެފަދަ ކަމެއް ކުރާކަށް އަހަރެން ބޭނުމެއްނޫނެވެ. ހިތުތެރޭގައި އުތުރިއަރަމުންދިޔަ ޝައިތާނާގެ ވަސްވާސްތަކުން ހިތް މައިތިރި ކުރަން އަހަރެން މަސައްކަތް ކުރީމެވެ. އެހެން ޚިޔާލުތަކުން ސިކުޑި ބަރުކުރެވޭތޯ މަސައްކަތް ކުރަމުންނެވެ.

އަހަރެން ސިހުނީ ދާދި ކައިރިން ފޯނެއްގެ އަޑުހަރު ރިންގުގެ އަޑަށެވެ. ބަލާލިއިރު ކުރިމަތީގައި އިން މަންމައުމުރުގެ އަންހެނެއްގެ ފޯނު ރިންގްވީއެވެ. އެއަޑަށް އެތަނުގެ އެންމެންގެ ސަމާލުކަން ދަމައިގަތެވެ. އެއީ ރިންގްޓޯންއަކަށްއިނީ ނައިފަރު ދޮހޮއްކުގެ ރީތި މުސްކުޅިލަވައަކަށް ވީތީ ކަންނޭނގެއެވެ. އެމީހާ އެންމެނަށް ބަލާލާފައި ލަދުން ހިނިތުންވެލިއެވެ. އަދި ފޯނާއި ކުޅެން ފެއްޓިއެވެ. އޭރުވެސް އަހަންނަށް އިނދެވުނީ ތޫގެ މޫނުގައި އަތްލީގޮތަށެވެ. ވަގުތު ފާއިތުވީވަރު އަހަންނަށް އެނގުނީ ގަޑިޔަށް ބަލާލުމުންނެވެ. މަންމަޔަށް ގުޅަންވެސް ހަނދާންވީ އެވަގުތުއެވެ. އަދި ފާޚަނާޔަކަށް ދާންބޭނުންވެފައިވާ ވަރުވެސް އިޙުސާސްވީ ދެނެވެ. އަހަރެން ލެޕްޓޮޕް ލައްޕާލަމުން ދަބަހަށްލީމެވެ. ފޯނަށްބަލާލިއިރު ފޯނުއޮތީ ފްލައިޓްމޯޑަށް ލީގޮތަށެވެ. އަހަރެން މަންމަގެ ނަންބަރަށް ޑައިލްކުރަމުން ލޮބީއިން ބޭރަށް ނުކުތީމެވެ. އަދި މަންމަޔާއި ވަހަކަދައްކަން ކުޑައިރުކޮޅަކު މަޑުކޮށްލާފައި ފާޚަނާޔާއި ދިމާލަށް މިސްރާބުޖެހީމެވެ.

އަހަރެން އެނބުރި ލޮބީއަށްއައީ ކައިގެންނެވެ. ކާހިތްނުވެފައި ހުރެވެސް ކެއީ ހަށިގަނޑު ވަރުބަލިވުމުން ސަލާމަތް ކުރުމަށްޓަކައެވެ. ލޮބީތެރެއިން ނުދަންނަ ފިރިހެން ކުއްޖަކު އަހަންނާއި ވާހަކަދެއްކިއެވެ. އެކުއްޖާއިނީ އަހަރެން ކުރިންއިންތަނުގައި އިށީދެނގެންނެވެ. ކައިރީގައި އަހަރެންވެސް ޖައްސާލުމާއިއެކު ހިނިތުންވެލާފއި އެކުއްޖާ ވާހަކަދެއްކީއެވެ. ރަޚްމަތްތެރި ގޮތަކަށް ވާހަކަދެއްކުމުން އަހަރެންވެސް ވާހަކަދެއްކީމެވެ. އެކުއްޖާވެސް ދަތުރުކުރީ އެކަނި ކަމަށްވުމާއިއެކު ރަޚްމަތްތެރި ވެލަންވެގެން ވާހަކަދެއްކީއެވެ. އެއީ ހައިކަލްކިޔާ ދިވެހި ކުއްޖެކެވެ. އެކުއްޖާގެ ވާހަކައިން އެއީ މެލޭޝިޔާގައި ކިޔަވަންއުޅޭ އަހަންނާއި އެއްއުމުރެއްގެ ކުއްޖެއްކަން އެނގުނެވެ. ހައިކަލް އަހަންނާއި ވަރަށްގިނަ ވާހަކަތައްދެއްކިއެވެ. އެއީ މަޖާމިޒާޖެއްގެ ހިންހެޔޮ، އަޚްލާގް ރަނގަޅު ކުއްޖެއްކަން އޭނަގެ ވާހަކަތަކުން އެކުޑަ ވަގުތުކޮޅުގެ ތެރޭގައި އަހަންނަށް އެނގުނެވެ. އަހަރެން އޭނަގެ ވާހަކަތަކާއި ވަރަށް ގަޔާވިއެވެ. އަހަރެންގެ ހިތާމަތަކަށް ކުޑަ ލުޔެއް ލިބުނުހެން ހީވީމައެވެ. އަހަރެން ވަރަށް ނިހާލުމެންމަތިން ހަނދާންވިއެވެ. ދިރިއުޅުމުގެ ހުރިހާ އެއްޗެއް ދޫކޮށްލާފައި އަހަރެން މެލޭޝިޔާއަށްދަނީ އާދިރިއުޅުމެއް ފެއްޓުމުގެ ބޭނުމުގައެވެ. އެގޮތުން އަހަރެން ޖެހޭނީ އާރައްޓެހިންވެސް ހޯދާށެވެ. ހައިކަލްއަކީ ރައްޓެއްސެއްގެ ގޮތުގައި ދެކެން ރަނގަޅު ޒުވާނެކެވެ. ހައިކަލް ކިތަންމެ ގިނަ ވާހަކައެއް ދެއްކިޔަސް އަހަރެން މާގިނަ ވާހަކަތަކެއް ނުދައްކަމެވެ. ހައިކަލްގެ ސުވާލުތަކަށް ކުރުޖަވާބުދިނީމެވެ. އެއީ ނުދަންނަ މޫނަކަށް ވުމާއިއެކު އޭނަޔާއި ހިއްސާކުރާކަށް އަހަންނަށް މާގިނަވާހަކަތަކެއް ނޭނގުނެވެ. ފަހަރުގައި އެއީ އަހަރެންގެ ބަދަލުވެފައިވާ މިޒާޖުގެ ސަބަބުން ކަމަށްވެސްވެދާނެވެ. ..................... (ނުނިމޭ)

Laaraa (05)

ލާރާ (ފަސްވަނަ ބައި)

(ހަތަރުވަނަ ބަޔާއިގުޅޭ)..................

އެލެކްސް އަހަރެން އެރަށަށް ގެނައީ އަހަންނަށް ހެދުންގަތުމަށެވެ. މަހެއްވަންދެން ތަކުރާރުނޮކޮށް ލެވޭވަރަށް އޭނާ އަހަންނަށް ހަވީރު ހެދުންގަނެފައި ދިނެވެ. ހުސް އޭނާގެ ޗޮއިސްއެވެ. އެއީ އަހަރެން ލައިއުޅޭ ވައްތަރުގެ ހެދުންތަކެއްވެސް ނޫނެވެ. ހުސް އަތްކުރު ޓޮޕާއި ޖިންސެވެ. އަހަރެން އެހެދުމުގައި ހުރިތަންފެނުމުން އެލެކްސްހުރީ ބުނާނެ އެއްޗެއް ނޭނގިފައެވެ. އަހަންނަށް ހިވީ ގައިން އެއްބައި މަދު ހެންނެވެ. އެކަމަކު އެހެދުމުގައި އަހަރެން ހުންނައިރު އެލެކްސްއަށް މާރީއްޗެވެ. އެހެދުންތަކުގެ އިތުރަށް ކުރު ސޯޓާއި ޓީޝާޓުވެސް ގަތީމެވެ. އަދި ރީތިވާން ބޭނުންވާ ހުރިހާ ސާމާނެއްވެސް ގަތީމެވެ. ދެން އެލެކްސް އަހަރެން ގޮވައިގެން ދިޔައީ ސެލޫނަކަށެވެ. އެތަނަށްގޮސް އަހަރެން ފޭޝިޔަލް ހެއްދީމެވެ. އަދިވެސް ޒީނަތްތެރިވުމަށްޓަކައި ކުރަންޖެހޭ އެހެނިހެން ކަންތައްވެސް ކުރީމެވެ. ހުރިހައި ކަމެއް ނިންމާލުމަށްފަހުވެސް މޫނުގައި މަލަންކޮޅު އަޅަން އަހަރެން ހަނދާން ނައްތައެއްނުލަމެވެ. ހަމައެތާގައި އެމަލަންކޮޅު އަޅައިގެން ބޭރަށް ނުކުތްއިރު އެލެކްސް ބޭރުގައި އިން ސޯފާއެއްގައި މެގަޒިންއެއް ހިފައިގެން އެއަށް ގެއްލިފައި އިނެވެ. އަހަރެން އެލެކްސްއަށް ގޮވާލުމާއިއެކު އެލެކްސް ބަލާލިއެވެ. އޭނަ ހުރީ އަހަންނަށް ބަލަހައްޓައިގެން ހުއްޓިފައެވެ. ފަހަރުގައި އަހަރެންގެ ބަދަލުވެފައިވާ ސިފަ ފެނުމުން ކަމަށްވެދާނެވެ. އަހަރެން ކުޑަކޮށް ލަދުވެސް ގަތެވެ. އަހަރެން އިސްޖަހާލުމާއިއެކު އެލެކްސްއަށް  ހިނތުންވުމަކާއިއެކު އެއްޗެކޭނުބުނެ އެތަނުން ނުކުންނަން ހިނގައިގަތެވެ. އަހަރެންވެސް އޭނާގެ ފަހަތުން ނުކުތީމެވެ.

ދުވަސްތައް ހޭދަވީ އުފަލާއި މަޖަލުގައެވެ. ހުނުމާއި ސަމާސާ ކުރުމުގައެވެ. މިހުނުމާއި ސަމާސާގައި އަހަންނަށް އެލެކްސްއަށް މާބޮޑަށް ހިތްދެވުނެވެ. އިންތިހާޔަށެވެ. އެހާވަރުންވެސް އެލޯބި ފޮރުވީމެވެ. ދެންއައީ އަހަރުމެންގެ ކައިވެންޏެވެ. ވަރަށް ސިރުގައެވެ. އެއްވެސް ބަޔަކަށް ނޭގެއެވެ. ކައިވެންޏަށްފަހު ވެސް އެލެކްސް އަހަރެން ދެކުނީ ގާތްރައްޓެއްސެއްގެ ގޮތުގައެވެ. ދެމީހުން އުޅުނީ ހަމަ ކުރީގައިވެސް އުޅޫނުގޮތަށެވެ. އެކަމަކު އަހަރެންގެ ޚިޔާލާއި ވިސްނުން ބަދަލުވިއެވެ. މިކަން އޭނަޔަށްވެސް ފާހަނގަ ކުރެވުނެވެ. އޭނާ އަހަންނަށް ޤަދަރުކުރިއެވެ. އަހަންނަށް ތަޢުރީފު ކުރެއެވެ. އަހަރެންކަހަލަ އަތްބެއް ނުލިބޭނެއޭވެސް ބުނެއެވެ. މައްސަލައަކީ އެންމެ މައްސަލައެކެވެ. އެއީ އޭނަގެ ފިރުމުންތަކަށް އަހަރެން ކެތްމަދުވުމެވެ. ހިތަށް ހާސްފަހަރު އަހަންނަކީ ކާކުކަން ބުނެލާނަމޭ ހިތަށްއަރައެވެ. ނަމަވެސް އަދި ވަގުތު ނުޖެހެއޭ ސިކުޑިބުނަމުން ދެއެވެ. އެލެކްސް އޭނާ ލޯބިވާކުއްޖަކު ހުންނަވާހަކަ އަހަރެންގާތު ބުންޏެވެ. އަހަރެން ދެރައެއްނުވަމެވެ. އޭގެ ބަދަލުގައި އޭނާގެ ދުލުން އެހެންބުނާ ކޮންމެފަހަރަކު އަހަރެން ވަނީ އުފަލެވެ. އެއީ އަހަރެންކަން އަހަންނަށް އެނގޭތީއެވެ. ކައިވެންޏަށް ހަފްތާއެއްވީދުވަހު އަހަރުމެން ލަންޑަނަށް ފުރީމެވެ. އަހަރެން ހުރީ އެބިމުގައި ފައިޖެއްސޭލެއް ލަސްވެފައެވެ. އެއީ އަހަރެންގެ ގެ ދެކެލުމަށެވެ. އަދި އަހަރެންގެ ހިތުގައިވާ ހުރިހާ ޝަކުވާތައް އޭގެ ވެރިންނަށް ރައްދު ކުރުމަށްޓަކައިވެސްމެއެވެ.

ފުރިދުވަހު މެންދުރު އަހަރުމެންނަށް ގައުމަށް ދެވުނެވެ. އެލެކްސްގެ ކާރުގައި އަހަރެން އެގެއަށް ދިޔައީމެވެ. އެމާހައުލަކީ ގިނަދުވަސްވިޔަސް އަހަންނަށް އާމާހައުލެއް ނޫނެވެ. އަހަރެންބެލީ އެލެކްސްގެ ގެއާއި ޖެހިގެންހުރި އަހަރެންގެ ގެއަށެވެ. އެހާ ގިނަދުވަސްވީއިރުވެސް އެގެއަށް މާބޮޑުބަދަލެއް އައިސްފައިނުވެއެވެ. ނަމަވެސް އެލެކްސްގެ ގެވަނީ ވަރަށްބޮޑަށް ބަދަލުވެފައެވެ. ތިންބުރިޔަށް ހުރި ގޭވަނީ ފަސްބުރިޔަށް ނަގާފައެވެ. ހީވަނީ ބޮޑު ގަނޑުވަރެއް ހެންނެވެ. ގޯތިތެރޭގައިވެސް އެކިވައްތަރުގެ މާމެލާމެލީގެ ގަސްތައް ހައްދާފައިވެއެވެ. ދޮރުން ވަންނަތާ ކުރިމަތީގައި ބޮޑު ފެންއަރުވާ ވަޑާމެއް ހުއްޓެވެ. މަންމަޔާއި ބައްޕަ ކޮންމެގޮތަކަށް ކަންތައް ކުރިޔަސް އަހަރެންހުރީ އެމީހުން ދުށުމަށް ކެތްމަދުވެފައެވެ. ގްރޭންޑްމާއާއި ގްރޭންޑްޕާވެސް މެއެވެ.

އެލެކްސްގެ ގޭގެ ދޮރު ހުޅުވާލުމާއިއެކު ފެނުނީ އޭނާގެ މަންމަޔާއި ބައްޕައެވެ. އަހަރެމެންގެ އުމުރަށް އައިބަދަލާއި އެއްވަރަށް އެމީހުންނަށްވެސް ހުރީ ބޮޑެތި ބަދަލުތަކެއް އައިސްފައެވެ. އެދެމީހުން އެކީގައި ކަހަލަގޮތަކަށް އައިސް އެލެކްސްގެ ގައިގައި ބައްދައިގަތެވެ. ރާއްޖޭގައި އެލެކްސް އުޅުނަސް މަހަކު އެއްފަހަރު ކަހަލަގޮތަކަށް އޭނާ މަންމަމެން ކައިރިޔަށް ދާކަމަށް އޭނާ ބުނެފައި ވެއެވެ. އިރުކޮޅަކުން އެތަނަށް އެހެން އަންހެނަކު އައެވެ. އޭނާވެސް އައިސް އެލެކްސް ގައިގައި ބައްދައި ގަންނަމުން ވެލްކަމް ހަނީއޭ ބުނެލިއެވެ. އަހަރެން ހައިރާންވެފައި ބަލަން ހުރީމެވެ. އެއީ އަހަރެން ދަންނަ މީހެއްނޫނެވެ. ކުރިން އެގެއިން ދެކުނު މީހެއްވެސް ނޫނެވެ. އަހަރެންގެ ހިތުގައި ނޭގޭ ރިހުމެއް އުފެދުނެވެ. އެލެކްސް އަހަންނާއި ދިމާލަށް ބަލާލިއެވެ. ''މިއީ އަހަރެންގެ އަންހެނުން ޕޯލީ....'' އެލެކްސް އެންމެން ތަޢާރަފް ކޮށްފައި އެއަންހެންމީހާވެސް ތައާރަފްކޮށްލިއެވެ. އެލެކްސްގެ ދުލުން ބޭރުވި އެޖުމްލައިން އަހަރެންގެ ފައިދަށުން ބިންގަނޑު ދެމިގެންދިޔަ ކަހަލައެވެ. މުޅިމީހާ އެތެރެއިން ފުޑުފުޑުވިއެވެ. އަހަރެންގެ ހިތުގައި އެތަކެއް ޝަކުވާތަކެއް އުފެދުނެވެ. މޫނުމަތީގެ ކުލަވަރު ބަދަލުވިއެވެ. ހިތަށްވަމުން ދިޔަތަދު ލޮލާއި ހަމަޔަސްވެސް އައެވެ. ނަމަވެސް ހަލުވިކޮށް އެސްފިޔަޖަހާލަމުން އަހަރެން އެހެންމީހުންނަށް އެކަން ސިއްރުކުރުމަށް މަސައްކަތް ކުރީމެވެ. ނަމަވެސް އެލެކްސްއަށް އެކަން ފާހަގަ ކުރެވުނީ ކަންނޭގެއެވެ. އެސްފިޔަ ޖަހާނުލާ އޭނާ އަހަންނާއި ދިމާލަށް ބަލަންހުރީތީއެވެ. އެލެކްސް ގޭމީހުންނަށް އަހަރެން ތަޢާރަފްކޮށްދިނެވެ. އެވަގުތު ގޭގައި ގެންގުޅޭ ހެދުމުގައި ހުރި މީހަކު ކުޑަ ބޭބީއެއް ގޮވައިގެން އައެވެ. އަހަންނަށް ބަލާލެވުނީ އެލެކްސްގެ މޫނަށެވެ. އެވަގުތު އެލެކްސް އެއީ އޭނާގެ ދަރިފުޅުކަމަށް ބުންނެވެ. އަހަރެންގެ ހަށިގަނޑު ތުރުތުރު އަޅަމުން ދިޔައެވެ. ދިރިއުޅުމަށް ކުރި ހުރިހާ އުންމީދެއް ސިކުންތުކޮޅަކުން ވިއްސި ވިހާލެވިގެންދިޔައީއެވެ. އެލެކްސްއަކީ އެހެންމީހެއްގެ މިލްކެކެވެ. އަހަންނަށް އެލެކްސްއާއި ބައްދަލުވެވުނުއިރު ވަގުތުވަނީ ފާއިތުވެފައެވެ. އަހަރެންގެ ދިރިއުޅުމާއިއެއްވަރަށް އަހަރެންގެ ހުވަފެންތައްވެސް ވަނީ ބަދަލުވެފައެވެ. ''ލީޝާ މިގެއަށް ގެނެވުނީ ހަމައެކަނި މިދަރިފުޅުގެ ހުރިހާކަމެއް ބެލެހެއްޓުމަށް...'' އެލެކްސްގެ މަންމަ އެތުއްތު ދަރިފުޅު ބޮލުގައި ފިރުމާލަމުން އަހަރެންގެ އަތަށްދިނެވެ. އެވަގުތު އަހަންނަށް ބަލާލެވުނީ ޕޯލީއަށެވެ. ދަރިފުޅުގެ މަންމަ ހުއްޓާ އެހެންމީހަކާއި ދަރިފުޅު ބެލުމުގެ ކަންތައް ހަވާލުކުރަނީ ކީއްވެހޭ އަހަރެންގެ ހިތަށްއެރިއެވެ. އަހަރެން ލޯބިން އެދަރިފުޅު އުރާލީމެވެ. އަދި ފެންކަޅިވެފައިހުރެ އެދަރިފުޅަށް ބަލާލީމެވެ. އަހަރެންގެ ލޯ ކަރުނުން ތެމުނެވެ. ހިތްރޯވެ އަދަމުންދިޔައެވެ. އަހަންނަށް މިނަސީބުކުރެއްވީ ކޮންކަހަލަ ކަމެއްބާއޭ ހިތަށްއެރިއެވެ. އަހަންނަކީ އަހަރެންގެ ފިރިމީހާގެ ދެވަނަ އަނބިމީހާއެވެ. އެވެސް އެހެންމީހުންނަށް ސިއްރުންނެވެ. ލޯބިވާމީހާއާއި ކައިވެނިކޮށްގެންވެސް އަހަންނަށް އުޅެންމިޖެހުނީ ގޭގައި ގެންގުޅޭ މީހެއްގެ ހައިސިއްޔަތުންނެވެ. އަހަންނަށް ހީވީ ޚުދް އަހަރެންގެ ނަފުސުވެސް އަހަންނަށް މަލާމާތް ކުރާހެންނެވެ.

ގޭގައި ގެންގުޅޭމީހަކު އަހަންނަށް އަހަރެންގެ ކޮޓަރި ދެއްކިއެވެ. އެލެކްސްގެ ބައްޕަގެ އެދުމުގެ މަތިންނެވެ. އަހަރެން ކޮޓަރިޔަށް ދިޔައީމެވެ. އެލެކްސްގެ ދަރިފުޅާއިއެކުއެވެ. އެދަރިފުޅު އަހަރެންގެ އަތުތެރޭގައި ލޯބިން ނިދާލާފައި އޮތެވެ. އަހަރެން ކަޅިޖަހާނުލާ އެދަރިފުޅަށް ބަލަމުންދިޔައީމެވެ. އެދަރިފުޅު އެންމެ ވައްތަރީ އެލެކްސްއާއިއެވެ. އެހެންވެ އެލެކްސާއި އެއްވަރަށް އެދަރިފުޅުވެސް އެހާ ރީއްޗެވެ. އަހަރެންގޮސް އެނދުގައި އިށީނީމެވެ. ގަނޑުވެފައިވާ ބުދެއްހެންނެވެ. އެލެކްސްގެ ލޯބި ނުލިބުނަސް ހެވެވެ. އޭނާ ދެކެވާ ލޯބި އޭނާގެ ދަރިފުޅަށްދެވިދާނެވެ. އަހަރެންގެ ދިރިއުޅުމުގެ މަގުސަދު ޖެހޭނީ ބަދަލުކޮށްލާށެވެ. އެދަރިފުޅުގެ ހައްގުގައެވެ. ލާރާ އަބަދައްޓަކައި ޖެހޭނީ ކަފުންކޮށްފައި ވަޅުލާލާށެވެ. ލީޝާގެ ގޮތުގައި އެލެކްސްއާއި އިންގޮތަށް ދިރިއުޅުމުގެ އެންމެ ފަހުވަގުތާއިހަމަޔަށްވެސް އުޅޭނީ އެގޮތުގައެވެ. އެލެކްސްގެ ދަރިފުޅު ތަރުބިއްޔަތުކޮށް އެދަރިފުޅު އަޚުލާގު ރަނގަޅު މާތް ކުއްޖަކަށް ހެދުމަކީ މިއަދު އަހަރެންގެ ޒިންމާއެކެވެ. މިއަދުން ފަށައިގެން އަހަރެންގެ މަންޒިލަކަށް ވާންޖެހޭނީ އެކަމެވެ. މިކަހަލަ އެތަކެއް ވާހަކަތަކަކުން އަހަރެންގެ ހިތް ހަމަޖައްސަން އަހަރެން މަސައްކަތް ކުރީމެވެ.

އަހަރެން ސިހުނީ  މީހަކު ދޮރު ހުޅުވާލުމުންނެވެ. ބަލާލިއިރު އެއީ އެލެކްސްއެވެ. އެލެކްސް އެތެރެއަށްވަނެވެ. އެވަގުތު އަހަރެން ހިފަހައްޓަމުންއައި ކަރުނަތަށް އިޚްތިޔާރުން ބޭރުވެގެން އޮހިގަތެވެ. ދެރަވިވަރުންނެވެ. އެލެކްސްގެ ކުރިމަތީގައި އަހަރެން ރޯކަށް ބޭނުމެއް ނުވިއެވެ. އެހެންވެ އަތުގެ ނުފުށުން ކަރުނަތައް ފޮހެލާފައި ހިތްވަރުކުރެވޭތޯ ބެލީމެވެ. އެލެކްސް އަހަންނަށް ބަލަންހުއްޓެވެ. ދެރަވެފައެވެ. ''ސޮރީ. އަހަރެން ކުރީގައި މެރިޑްއޭ ނުބުނެވުމުން.'' އެލެކްސް އިސްޖަހާލިއެވެ. އަހަންނާއި ހަތަރުކަޅި ހަމަކުރަން ބޭނުންނުވީ ކަންނޭގެއެވެ. އަހަރެން ކުޑަމީހާ އެނދުގައި ރީއްޗަށް ބާއްވާލީމެވެ. ނުވެއްޓޭނެ ގޮތަށެވެ. އަދިއެއަށްފަހު އެލެކްސް ކައިރިޔަށް ދިޔައީމެވެ. ''ކީއްވެ އޮޅުވާލީ؟'' އަހަންނަށް ގިސްލެވުނެވެ. ''ކީއްވެ އަހަރެން ކައިރީގައި ހުރިހާ ކަމެއް ކުރިން ނުބުނީ؟ އަހަންނާއި ކައިވެނި ކުރަން ބޭނުންވަނީ ހަމައެކަނި އެލެކްސްގެ ދަރިފުޅު ބަލަންކަމުގައި ކީއްވެ ނުބުނީ؟ ދަރިފުޅުބަލަން އަހަންނާއި ކައިވެނި ކުރީ ކޮންބޭނުމަކު؟ ކައިވެނި ނުކުރިޔަސް އެލެކްސް އަހަރެން ކައިރީގައި އެކަމަށް އެދުނުނަމަ އުފަލުން ކޮށްދިނީމުސް... އަހަންނަކީވެސް އިންސާނެކޭ.... އަހަރެންގެވެސް ހިތެއް އޮވެޔޭ...'' އަހަންނަށް ރޮމުން ބިންމައްޗަށް ތިރިވެވުނެވެ. ''އެލެކްސްއާއި ކައިވެނި ކުރެވުމުން އަހަރެން ހީކުރީ އަހަރެންގެ ދިރިއުޅުން ބަދަލުވީކަމަށް.... އެކަމަކު.....'' އަހަންނަށް މިހާހިސާބަށް ބުނެވުނުތަނާ އެލެކްސް އަހަރެންގެ ކޮނޑުގައި ހިފާ ތެދުކުރިއެވެ. ''ލީ... ޕްލީޒް.. ހުއްޓާލާ.... އަހަރެން ލީއަށް ދެރަގޮތެއް ނަހަދާނަން.... ލީއަށް މަދުވާނެ އެއްވެސް އެއްޗެއް ނޯންނާނެ..... އަހަންނަށް އެނގޭ ލީއަށް ހަގީގަތް އެނގުމުން ދެރަވާނެކަން. ކުރީގައި އަހަންނަށް ހުރިހާ ވާހަކައެއް ކިޔައި ނުދެވުނީ މަޖުބޫރުވީވަރުން. އަހަރެން ހީކުރީ ހުރިހާ ކަމެއް އެނގިގެން ލީ އަހަންނާއިއެކު ލަންޑަނަށް ނައަންނާނެ ކަމަށް. އެހެންވެ ކައިވެނި ކުރަންބުނީވެސް. އަހަންނަށް މިވަގުތު ލީގެ ބޭނުން ވަރަށް މުހިންމު.. އަހަރެން ބޭނުމެއް ނޫން އަހަރެންގެ ދަރިފުޅު އެހެންދީނެއްގެ މީހަކަށް ވާކަށް. ޕޯލީއަކީ ކްރިސްޓިޔަނެއް.'' އެލެކްސް ފެންކަޅިވެފައިހުރެ ބުނެލިއެވެ. އަހަންނަށް އެނާގެ މޫނަށް ބަލާލެވުނެވެ. ''އަހަރެންގެ އަންހެނުންނަކީ އަހަރެންގެ މަންޒިލެއްނޫން. އަހަރެންގެ މަންޒިލަކީ އެހެންމީހެއް. އެއީ އަހަރެންގެ ގެއްލިފައިވާ ލޯބި.'' އެލެކްސް ވަރަށް އަސަރާއިއެކު ވާހަކަދައްކަމުން ދިޔައެވެ. ''އެއީ ވަރަށް ދިގުވާހަކައެއް. އެހެންފަހަރަކުން ކިޔައިދޭނަން. އަހަރެން ޕޯލީއާއި މެރީކުރީ މަންމަމެންގެ އެދުމުގެ މަތިން. އަދި ދަރިއެއް ހޯދީވެސް އެމީހުން ބޭނުންވެގެން. މިލޯބި ލާރާ އަހަރެން ދެކެނީ އަހަރެން ހަމައެކަނި ލޯބިވާ ލާރާގެ ނިޝާނެއްގެ ގޮތުގައި. މިތުއްތު ލާރާގެ މޫނަށް ބަލާލާ ކޮންމެފަހަރަކު އަހަންނަށް އަހަރެންގެ ލާރާގެ ހަނދާންތައް އާވޭ. އެމޫނު ސިފަވެގެންދޭ...'' އެލެކްސް ނިދާފައިއޮތް ތުއްތު  ލާރާގެ ކޮލުގައި ލޯބިން ފިރުމާލަ ފިރުމާލާއިނެވެ. އަހަންނަށް ހުރެވުނީ ހައިރާންވެފައި ބަލަހައްޓައިގެންނެވެ. 
.................. (ނުނިމޭ)